Nur-Sultan qalasynyń ákimi Altai Kólginov LRT qurylysynyń qaita bastalýy jóninde pikir bildirdi, dep habarlaidy "Ult aqparat".
«Iá, qazir qurylys maýsymy júrip jatqandyqtan, LRT qurylysy qaita jandandy. Sharttar burynǵydai, jumystar soǵan sáikes júrgizilýde. Belsendi jumys júrip jatyr dep aita almaimyn. Belsendi jumys qarajattyń túsýine qarai jalǵasady. Qazir konkýrstyq rásimder, bankterdi tańdaý júrip jatyr. Qarjylandyrý kózderin anyqtaǵan soń, jumystardy jandandyramyz», - dedi Kólginov Ortalyq kommýnikatsiialar qyzmetinde ótken baspasóz máslihatynda.
Onyń aitýynsha, qurylys-montaj jumystaryn júrgizerden buryn tehnikalyq saraptama ótip jatyr.
«Oǵan qosymsha qarajat tartylǵan joq, bul - ishki rezervter. Merdiger kompaniialar quramynda qytailyq ta, jergilikti seriktester de bar. Qoldanystaǵy shart boiynsha jumystar júrgizilip jatyr. Qarjylandyrýdyń qosymsha kólemin tartqan kezde belsendi jumysty bastaimyz. Bastapqyda 2,6 milliard dollar bolǵan edi. Biz ony 800 mln dollarǵa tómendettik jáne únemdedik. Qazir jobany aiaqtaý úshin shamamen bir mlrd dollar qajet. Vagondar, relster, infraqurylym. Jalpy, qurylysty tolyq bitirý úshin osynsha qarajat kerek.
Biz syrtqy qaryzdarǵa konkýrs jariialadyq. Bankterdi anyqtaǵannan keiin qosymsha habarlaimyz. Eger ishki qarjy naryǵynda niet bildirýshiler bolsa, olardy da qarastyramyz. Qarjylandyrý kózderin izdeý konkýrsy jazdyń sońyna deiin aiaqtalady», - dep atap ótti Kólginov.
Onyń aitýynsha, bul rette Biryńǵai jinaqtaýshy zeinetaqy qorynan (BJZQ) qarajat alý qarastyrylmaidy. "Tek ekinshi deńgeili bankter ǵana", - dedi ákim.
Eske salsaq, Memleket basshysy Qasym-Jomart Toqaev Nur-Sultan qalasynyń ákimdiginde ótken májiliste LRT qurylysy isin tergeýdi jedeldetýdi tapsyrǵan bolatyn.
Isti tergeý 2020 jyldyń basynda aiaqtaldy. Tergeý kezinde 10-nan astam adamnyń jaýapkershiligi tekserildi.
Sondai-aq, 3 adamǵa Interpol jelisi arqyly izdeý jariialanǵan.
Is sotqa 2020 jyldyń 2 qazanynda joldandy.
Sybailas jemqorlyqqa qarsy is-qimyl agenttigi 2-departamentiniń basshysy Sergei Perov osy iske qatysty kúdikti dep tanylǵan Talǵat Ardan men Qanat Sultanbekovtiń qaida júrgeni týraly aqparat bar ekenin málimdegen edi. LRT isi boiynsha 6 mlrd teńgege jýyq qarjyny talan-tarajǵa salǵandar 7-10 jylǵa sottaldy.
