Foto: Politsiia
Atyraý oblysynda joǵalǵan bir otbasyǵa qatysty rezonansty is jańa kezeńge ótti. Sanjar Ádilov májilis kýlýarynda atalǵan qylmys boiynsha sońǵy málimetterdi jariia etti, dep habarlaidy Ult.kz.
Buǵan deiin IIM baspasóz qyzmeti Indoneziianyń Lombok aralyndaǵy Senarý aýylynda Atyraý oblysynda asa aýyr qylmys jasady degen kúdikke ilingen er adamnyń ustalǵanyn habarlaǵan bolatyn. Keiin onyń buryn habar-osharsyz ketken, halyqaralyq izdeýge jariialanǵan burynǵy jubaiy da tabylǵany anyqtaldy.
Vitse-ministrdiń aitýynsha, kúdiktilerdi Qazaqstanǵa qaitarý máselesi sheshilip jatyr.
«Olardy Qazaqstan Respýblikasyna qaitarý máselesi qaralýda. Jubailardyń ekeýi de kúdikti retinde tanylyp otyr. Iz-tússiz joǵalǵan taǵy eki adamdy izdeý jalǵasýda. Atyraý oblysynda arnaiy jedel-tergeý toby jumys isteýde», – dedi Sanjar Ádilov.
Qaiǵyly oqiǵa qalai órbidi?
Qańtar aiynyń basynda Atyraý oblysynda erli-zaiypty men olardyń eresek balalary jumbaq jaǵdaida joǵalyp ketkeni belgili boldy. Oblystyq politsiia departamenti Maqsot Qarabalin, Násip Óteshqalieva, Miramgúl Qarabalina jáne Naýryz Muqanǵalievke izdeý jariialaǵan edi.
6 qańtar kúni Atyraý oblystyq politsiia departamenti erli-zaiyptynyń óli tabylǵanyn málimdedi. Al olardyń uly men qyzy áli kúnge deiin izdestirilip jatyr.
Keiin Quqyqtyq statistika jáne arnaiy esepke alý organdary komiteti portalynda kúdikti retinde Sultan Sársemalievke qaza tapqan erli-zaiyptynyń kúieý balasyna qatysty aqparat jariialandy. Oǵan jáne onyń jubaiyna halyqaralyq izdeý jariialanǵan.
Tergeý barysynda politsiia marqum zeinetkerlerdiń denesinde pyshaq jaraqattary bolǵanyn habarlady. Bul derek istiń qasaqana jasalǵan qylmys ekenin aiqyndai túsedi.
Tergeý jalǵasýda
Qazir qylmystyq is boiynsha tergeý amaldary jalǵasyp jatyr. Kúdiktiler Qazaqstanǵa ekstraditsiialanǵannan keiin istiń jańa qyrlary ashylýy múmkin.
Bul is qoǵamda úlken alańdaýshylyq týǵyzdy. Qos zeinetkerdiń qaza tabýy, balalarynyń iz-túzsiz joǵalýy jáne kúdiktilerdiń shetelden tabylýy oqiǵanyń aýqymy men kúrdeliligin kórsetedi.
