Nur-Sultan qalasynyń bas sanitar dárigeri Sarhat Beisenova elordada Qurban ait ótkizý talaptaryn túsindirdi, dep habarlaidy QazAqparat.
«Koronavirýs pandemiiasyna bailanysty buqaralyq is-sharalar ótkizýdiń shektelýine orai, biyl qala meshitterinde merekelik Ait namazy ótkizilmeidi. Mundai sharalar halyq arasynda koronavirýs infektsiiasyn odan ári boldyrmaý úshin qabyldandy. Biz kún saiyn infektsiialyq jaǵdaidyń kóptep tirkeletinin kóremiz. Barlyq turǵyndardy asa qajettiliksiz adam kóp jinalatyn oryndarǵa barmaýǵa shaqyramyn», - dedi spiker Nur-Sultan qalasy ákimdigindegi brifingte.
Sonymen birge, bas sanitar dáriger aralasatyn adamdardyń qataryn shektep, úige kisi shaqyrmaýǵa jáne qonaqqa barmaýǵa keńes berdi.
«Eger koronavirýs infektsiiasynyń ósý dinamikasy tómendemese, azamattar men kásipkerlik sýbektiler tarapynan qatań sanitarlyq normalary saqtalmaityn bolsa, biz lokdaýnǵa oralýǵa májbúr bolamyz. Elordadaǵy epidemiologiialyq jaǵdai kóbine ózimizge bailanysty ekenin túsiný mańyzdy. Sondyqtan biz vaktsinalaý arqyly ǵana aýrýdyń ósýine qarsy tura alamyz. Vaktsinatsiia – eń aldymen, ózińiz aralasatyn jaqyndaryńyz ben jumys isteitin adamdar aldyndaǵy, otbasy men týǵan-týys aldyndaǵy jaýapkershilik. Tek jappai vaktsinalaý ǵana pandemiiany jeńýge jáne qalypty ómirge oralýǵa kómektesetinin umytpaiyq», - dedi Sarhat Beisenova.
