«Sovestkii sport» portalynyń jýrnalisi Dmitrii Spirinniń oiynsha, Rio-Olimpiadasy aiasyndaǵy Levit-Tishenko finaldyq jekpe-jegi boiynsha shyǵarylǵan sheshim AIBA-nyń medal úlestirý saiasatyn ashyq kórsetti. Osy jekpe-jekten Ózbekstan quramasy paida kórdi, dep habarlaidy Baq.kz tilshisi.
«Ol jekpe-jekti neshe ret kórsek te, qai qyrynan qarasaq ta, Vasilii Levittiń basymdylyǵy aiqyn baiqalady. Ol altyn medalǵa laiyqty óner kórsetti. Menińshe, bul jerde tóreshiliktiń olqylyqtary jaiynda emes, AIBA-nyń belgili bir saiasaty týraly aitqanymyz jón. Bul degenimiz, Resei ózine «tiesili» altynyn aldy. Alaida ol sheshimniń paidasy Ózbekstan komandasyna tidi. Sebebi bizdiń boksshylarymyz – Aloian men Dýnaitsev teń dárejede óner kórsetse de, jeńisti ózbek boksshylaryna berdi. Ol jaqta Resei quramasynyń jospary oryndaldy, bir altyn, bir kúmis pen eki qola, osymen upaiy túgel dep sheshken shyǵar», - deidi D.Spirin.
Aita keteiik, finaldyq jekpe-jekte jerlesimiz Vasilii Levittiń basymdyǵy baiqalsa da, tóreshiler óz sheshimin reseilik Tishenkonyń paidasyna shyǵardy. Osydan keiin zalda otyrǵan halyq ysqyryp, óz narazylyǵyn bildirdi.
