Koronavirýs pandemiiasy kezinde sapaly ári tekserilgen aqparatqa qajettilik týyp, bul BAQ reitingin kóterýge yqpal etti. Bul týraly «QAZAQSTAN» RTRK» AQ Basqarma tóraiymy Lázzat Tanysbai otandyq BAQ salasyn damytý máselelerine arnalǵan dóńgelek ústel jiynynda aitty, dep habarlaidy QazAqparat.
Lázzat Tanysbai televiziia mamandary ǵalamtordy óz ónimderimizdi keń aýditoriiaǵa jetkizýdiń qosymsha quraly retinde qarastyryp otyrǵanyn atap ótti.
«Ǵalamtordyń damýymen birge teleónimge qol jetkizýdiń múmkindikteri artty. Máselen, Youtube internet-platformasynda eń kóp qaralym jinaityn televiziialyq jobalar ekenin aita ketken jón. Sońǵy 90 kúnde Youtube-taǵy tanymal jobalardyń úzdik jiyrmalyǵyn otandyq telearnalardyń kontenti qurap otyr. «QAZAQSTAN» arnalaryn alatyn bolsaq, internettegi aýditoriiamyzdyń sany 6 mln-ǵa jýyqtap qaldy. Youtube jazylýshylar sany – 4,5 mln. Iaǵni, bul – kúndelikti dástúrli teleaýditoriiadan bólek, bizdiń ónimderimizdi qosymsha tutynatyn kórermen», – dedi Lázzat Tanysbai.
TNSGallupMedia kompaniiasynyń derekteri boiynsha pandemiia kezinde aýditoriia naqty aqparatty telearna jańalyqtarynan izdegen. Respondentterdiń 52%-y dástúrli mediany, onyń ishinde televiziiany eń senimdi aqparat kózi retinde tańdaǵan. Atalǵan kezeńde teledidar kórý belsendiligi Qazaqstanda 22% -ǵa artty.
Sonymen qatar, telearnalarda keiingi kezde tikelei efir formatyna basymdyq berilip jatqany sóz boldy.
