Tselinograd aýdany Otaýtúsken aýylynyń 43 jastaǵy turǵyny qyzyn qutqarmaqshy bolǵan kezde ózi sýǵa batyp ketti, dep habarlaidy "Ult aqparat".
Aqmola oblysy TJD baspasóz qyzmetiniń málimetinshe, jazataiym oqiǵa maýsymnyń 8-inde saǵat 13:00-de Tselinograd aýdany Otaýtúsken aýylynyń mańynda Nura ózeninde balyq aýlaý kezinde oryn alǵan.
«Ózen jaǵasynda júrgende qyzy anasynan ruqsat surap, sýǵa shomylmaqshy bolady. Alaida, sýdyń aǵysy qyzdy alyp ketedi. Muny kórgen anasy qyzyn qutqarýǵa umtylǵan, biraq qatty aǵyn saldarynan 43 jastaǵy áieldiń ózi sýǵa batyp ketti», - dedi vedomstvodan.
Al, jaǵadaǵy ósimdiktiń butaǵyna jarmasqan on jasar qyz janushyryp kómek suraǵan. Ony estigen Otaýtúsken aýylynyń 65 jastaǵy turǵyny Pavel Fedorenko qyzdy qutqaryp qaldy.
«Oqiǵa ornynda Nur-Sultan qalasy TJD Jedel-qutqarý jasaǵynyń qutqarýshylary jumys istedi, olar keshki saǵat 19:30 shamasynda áieldiń denesin tapty», - dep tolyqtyrdy vedomstvodan.
