Foto: freepik.com
Búgin Astanada "Adam saýdasyna qarsy is-qimyl týraly" jańadan qabyldanǵan zańnyń oryndalýyna bailanysty jiyn ótip jatyr. Jiynǵa qatysqan spikerlerden ULT.KZ tilshisi qoǵamdy dúr silkindirgen oqiǵalardyń biri Qyzylordada seksýaldy quldyqta bolǵan qyzdyń oqiǵasyna qatysty suraýǵa tyrysqan edi.
Májilis depýtaty, sharanyń moderatory Marat Bashimov Qyzylordada bolǵan oqiǵa osy zańdardyń qabyldanýymen sáikes kelip turǵanyn aitty.
"Sol úshin qoǵam da, depýtattar da osyǵan óte úlken kóńil bólip otyr. Zańdy oryndaýdyń mańyzdylyǵy osynda. Zań bolmasa qalai jumys isteidi? Bárimiz de osyǵan úles qosýymyz kerek", - deidi.
QR Adam quqyqtary boiynsha ókil Artýr Lastaev mundai jaǵdailar qaitalanbaýy úshin jazanyń bultartpastan oryndalýyn qamtamasyz etemiz dep otyr.
"Birinshiden ondai oqys oqiǵalar bolǵanda quqyq qorǵaý organdary tiisti qylmystyq kodeks aiasynda tergeýdi birden bastaityny belgili. Biz de monitoring jasaimyz. Bizdiń Qyzylorda aimaǵyndaǵy ókilimizge tergeýdiń qalai júrip jatqanyn monitoring jasaý boiynsha tiisti tapsyrmalar berilgen. Bizdiń basty mindetimiz qoǵamda mundai qylmystar aqtalmaitynyn kórsetý úshin jazanyń bultartpastan oryndalýyn qamtamasyz etý.
Ekinshiden, zardap shekkender tiisti kómek pen ońaltýdan ótip, tolyq aiyǵyp ketýin qamtamasyz etýdi qadaǵalap, tiisti sharalardy qabyldaimyz. Qajetti jumystar atqarylýda. Barlyq detaldardy ashyq aita almaimyn", - dedi Artýr Lastaev.
Al halyqaralyq uiymdar bul jaǵdaidy baqylap otyr ma? Biz suraǵymyzdy "QR halyqaralyq kóshi-qon uiymy adam saýdasyna qarsy baǵdarlamasynyń ulttyq úilestirýshisi Áliia Belonosovaǵa qoiyp kórdik, alaida ol jaýap berýden bas tartty. Biraq, ne úshin ekenin túsindirmedi.
Aita keteiik, 21 qarashada Senat otyrysynda Ishki ister ministri Erjan Sádenov Qyzylordada synyptastary jezókshelikpen ainalysýǵa májbúrlegen qyzdyń isiniń qalai órbip jatqanyn aitqan. Onyń sózinshe toǵyz qylmystyq istiń beseýi aiaqtalǵan.
"Aldaǵy ýaqytta taǵy birneshe is qozǵalatyn bolady. Aiaqtaǵannan keiin barlyq materialdar sotqa joldanyp, oǵan núkte qoiylady", - dedi Sádenov.
2024 jylǵy 5 qyrkúiekte «Adam saýdasyna qarsy is-qimyl týraly» jańa zań kúshine endi. Qujat aiasynda Qylmystyq kodekske adam saýdasyna bailanysty jańa qylmystar engizildi jáne «seksýaldyq sipattaǵy ózge de qyzmetter» uǵymy paida bolady.
Jańa zań boiynsha qylmystyq jaýapkershilik qarastyrylady:
- Adamdardy, onyń ishinde kámeletke tolmaǵandardy jynystyq qyzmetke tartý jáne jeńgetailyq;
- Bul qyzmetterdi nasihattaý jáne jarnamalaý;
- Internet arqyly jezókshelikpen ainalysý nemese jeńgetailyq pritondaryn uiymdastyrý.
Sonymen qatar, tatýlasýǵa bailanysty qylmystyq jaýapkershilikten bosatý alynyp tastaldy.
11 qarashada Qyzylorda qalasynyń №2 sotynda bul is boiynsha alǵashqy úkim shyǵyp, 21 jastaǵy aiyptalýshy "Bopsalaý" isi boiynsha 4,5 jylǵa bas bostandyǵynan aiyryldy. Qoǵamda bul jaza merzimin az dep jatqandar da bar.
Eske salsaq, 8 tamyzda Qyzylorda qalasynyń turǵyny kámeletke tolmaǵan qyzyn synyptastary esirtki berip, jezókshelikpen ainalysýǵa májbúrlep, azaptaǵanyn aitqan.
