Qyzylordadaǵy balalar oiyn-saýyq ortalyǵynda jarylys boldy. Ortalyqtyń birinshi qabaty órtke orandy, - dep habarlaidy "Ult aqparat" Qyzylorda oblystyq TJD baspasóz qyzmetine silteme jasap.
Jarylys búgin saǵat 7.20 shamasynda bolǵan.
"Jarylys tolqyny saldarynan oiyn-saýyq ortalyǵynyń mańyndaǵy 50 sharshy metr aýmaqta ornalasqan aǵash sarai men shatyr opyrylyp, Jeńis kóshesindegi kórshi úidiń terezeleri de búlingen.
Órt qyzmetiniń birinshi bólimshesi oqiǵa ornyna jergilikti ýaqyt boiynsha 7.24-te keldi, barlaýdan keiin órtti sóndirýge kiristi. Jarylys saldarynan órt 200 sharshy metrlik balalar oiyn-saýyq ortalyǵynyń birinshi qabatyn sharpyǵan", - delingen habarlamada.
Oqiǵa ornyna jedel jetken «QazTransGaz Aimaq» AQ Qyzylorda filialynyń qyzmetkerleri, gaz qyzmetiniń avariialyq-dispetcherlik brigadasynyń mamandary «Pýmba» kafesin jáne osy ǵimaratqa jaqyn turǵan úidi gazdan ajyratqan.
Qutqarýshylar órtti 7.44-te oqshaýlap, 8.15-te tolyǵymen sóndirdi. Qaza bolǵandar men zardap shekkender joq.
"Órttiń shyǵýynyń aldyn ala sebebi - tabiǵi gazdyń shyǵýy", - dedi TJD ókili.
Órtti sóndirýge Qyzylorda oblysy TJD-nyń 48 qyzmetkeri men 12 tehnikasy, politsiia departamentiniń 8 qyzmetkeri men 3 tehnikasy, jedel meditsinalyq járdem brigadasynyń 9 qyzmetkeri men 3 tehnikasy, "QazTransGazAimaq" AQ-nyń 2 qyzmetkeri men 1 tehnikasy, "QETK" AQ-nyń 2 qyzmetkeri men 1 tehnikasy jumyldyryldy.
