Foto: Polisia.kz
Qyzylorda oblysynda din salasyndaǵy zań buzýshylyqtarǵa qarsy kúres kúsheidi. Jyl basynan beri óńirde osy baǵytta 14 ákimshilik quqyq buzýshylyq tirkelgen, dep habarlaidy Ult.kz Polisia.kz-ke silteme jasap.
Quqyq buzýshylyqtardyń basym bóligi oblystyq politsiia departamentiniń ekstremizmge qarsy is-qimyl basqarmasy júrgizgen reidter kezinde jáne áleýmettik jeliler men internet-resýrstarǵa jasalǵan monitoring nátijesinde anyqtalǵan.
Zań talaptaryna sáikes, dini ádebietter men mazmundaǵy materialdardy tek arnaiy ruqsaty bar, resmi tirkelgen saýda oryndary ǵana tarata alady. Alaida bul talaptar jii buzylyp otyr. Internet arqyly dini ónimderdi zańsyz satý derekteri de kezdesýde.
Máselen, Baiqońyr qalasynyń 38 jáne 34 jastaǵy turǵyndarynyń úilerinde júrgizilgen tintý barysynda 180-ge jýyq dini kitap tárkilendi. Atalǵan azamattarǵa qatysty Ákimshilik quqyq buzýshylyq týraly kodekstiń 490-baby boiynsha hattama toltyryldy.
Sondai-aq 32 jáne 36 jastaǵy turǵyndar “VKontakte” áleýmettik jelisi arqyly dini mazmundaǵy aýdio jáne beinematerialdar taratqany anyqtaldy. Bul faktiler onlain monitoring barysynda belgili bolǵan.
Politsiia ókilderi mundai zań buzýshylyqtarǵa qarsy sharalar aldaǵy ýaqytta da jalǵasatynyn málimdedi. Barlyq anyqtalǵan derekter boiynsha zań aiasynda tiisti sheshimder qabyldanady.
Sonymen qatar óńirde turǵyndardyń quqyqtyq saýatyn arttyrý maqsatynda túsindirý jáne aldyn alý jumystary júrgizilýde. Tártip saqshylary dini ádebietterdi taratý talaptaryn túsindirip, zańdy saqtaýdyń mańyzdylyǵyna erekshe nazar aýdarýda.
