Foto: videodan kadr
Qyzylordada seksýaldy quldyqta bolǵan oqýshynyń isine qatysty jaza arqalaǵan Beksultan Tynystyń týystary úkimmen kelispeitinin aityp, shaǵymdandy. 21 jastaǵy jigit jábirlenýshiden qomaqty qarajat bopsalady degen aiyppen tórt jarym jylǵa sottalǵan. Al aiyptalýshynyń anasy sýdia eshqandai dálel-dáieksiz, ne kýágerlersiz tek qyzdyń aryzyna súienip sheshim shyǵardy deidy. Sondyqtan olar balamyz aqtalsyn degen talappen sotqa júgingen, dep habarlaidy Informbiýro baǵdarlamasy.
Qyzylordadaǵy atýshyly is boiynsha ázirge bir ǵana jigit jazalandy. Alaida sottalýshynyń týystary sot sheshimimen kelispeidi. Olardyń aitýynsha, 21 jastaǵy jigit oqýshy qyzǵa tiispegen. Sebebi, onyń kámelet jasyna tolmaǵanyn bilip, qyzmetinen bas tartqan. Bul derekti saraptama qorytyndysy da rastady, deidi sottalýshynyń jaqyndary.
"Qyz kirgen kezde balama jap-jas kórinipti. Jasyń neshede dep suraǵan eken, jasym 19-da depti. Sen jasyryp tursyń birdeńeni degen. Sosyn men 2007 jylǵymyn degen. Sosyn sen jassyń ǵoi, mundai bolmaidy dep shyǵyp ketipti", – deidi sottalýshynyń týysy Kúláisha Baidúisenqyzy.
Sottalýshynyń jaqyndarynyń sózinshe, Beksultan men qyz bir ret ǵana jolyqqan. Biraq oqýshy qyz jigittiń ústinen politsiiaǵa 700 myń teńge bopsalady jáne qaltamdaǵy 35 myń teńgeni tartyp aldy dep aryzdanǵan. Al bul aiyptaýlardyń birde-biri sotta dáleldenbedi, deidi sottalýshynyń anasy.
"Biz úsh sotta da boldyq. Úsh sotta da eshqandai dáleldemeler joq. Tek qana bos sózder, aiǵaq ta joq. Tek qana sol qyzdyń bos sózderi. Meniń qaltamnan 35 myń teńge aldy, uiymdasqan qylmyspen kúres dep 700 myń teńge talap etti degen. Psihologiialyq, moraldyq turǵydan sharshadyq. Tek qana balam aman shyqsa boldy. Jazyqsyzdan jazyqsyz sottaýǵa jol bermeimin", – deidi sottalýshynyń anasy Aigúl Ábdihalyqova.
Aita keteiik, seksýaldyq quldyqta bolǵan qyzylordalyq 16 jastaǵy qyzǵa qatysty is boiynsha keibir is tergeýde, al keibiri sotta qaralyp jatyr. Al qyzdy bopsalady degen aiyppen sottalǵan Beksultan Tynystyń jaqyndary appeliatsiialyq sotqa shaǵym túsirdi. Sondyqtan oblystyq sottyń ókilderi ázirge jaýap bermeimiz deidi.
Eske salsaq, buǵan deiin Qyzylordada 16 jastaǵy qyzdy synyptastary jezókshelikpen ainalysýǵa májbúrledi degen kúdikke ilingeni týraly jazǵan edik. Ishki ister vitse-ministri Igor Lepeha atalmysh is boiynsha 13 kúdikti ustalǵanyn málimdedi. Seksýaldy quldyqta bolǵan 16 jastaǵy qyz saraptama kezinde qysym kórgenin aityp shaǵymdanǵan edi.
Bul is boiynsha sot úkimimen T "bopsalaý" baby boiynsha qylmys jasaǵany úshin kináli dep tanyldy. Sot sottalýshyny 4 jyl 6 aiǵa bas bostandyǵynan aiyrdy. Sottalýshynyń buǵan deiin sottylyǵynyń bolmaýy jáne jigittiń jasy (21 jas) jeńildetetin jaǵdailar bolyp tanylǵan.
