Alyp-satýǵa arnalǵan qazaqstandyq Olx portalynda Qyzylorda oblysyndaǵy munai kenishiniń satylatyny týraly jarnama paida boldy. Kenishi qara altynǵa toly jeri úshin jeke tulǵa 8 million dollar nemese 2 mlrd 918 mln 320 myń teńge surap otyr. Tipti, alǵysy kelgen adammen saýdalasýǵa daiynmyn deidi ol.
"Buryn eshkim burǵylamaǵan, munaiyn igermegen. Biz ózimiz demeýshi izdep kórdik, biraq, eshkim tabyla qoimady. Sondyqtan, satý úshin jarnamalap otyrmyz. Jer Qumkól trassasyndaǵy "Kazma" kompaniiasynan 25 shaqyrym qashyqtyqta ornalasqan. Jerdiń kenishine barlaý jumystary Keńes odaǵynyń tusynda júrgizilgen. Ol kezdegi qujattardyń bári qolymyzda bar. Jer jekemenshik ieliginde", - deidi Rýstam Ryspekov esimdi jarnama berýshi.
Onyń aitýynsha, satylyp jatqan jerde infraqurylymnyń eshqandai túri joq. Alaida, elektr qýaty men sýdy jaqyn mańnan júrgizýge bolady.
"Elektr qýaty men sý 25 shaqyrym qashyqtyqta bar. Basty trassa 30 shaqyrym, temirjol 175 shaqyrym qashyqtyqta ornalasqan. Satyp alýshy tabylyp jatsa satamyz, investor tabylsa aqyldasýǵa daiynbyz", - deidi R.Ryspekov.
