Qazaqstanda qyzmeti kúmán týdyratyn qarjylyq uiymdardyń tizimi jasalyp, jariia etildi. Bul týraly QR Qarjy naryǵyn retteý jáne damytý agenttigi tóraǵasynyń orynbasary Oleg Smoiakov Úkimet otyrysynda málim etti, dep habarlaidy QazAqparat.
«Azamattardy qarjy naryǵynda zańsyz qyzmet belgileri bar kúmándi sýbektilerden qorǵaý úshin aldyn alý sharasy qaralyp jatyr. Iaǵni qazaqstandyqtardy túrli senimsiz qarjy operatsiialaryna qatysýdan bas tartqyzý maqsatynda. Osy oraida biyl qazan aiynda bizdiń agenttik kúdikti qarjylyq sýbektilerdiń tizimin jariialady. Ol tizimniń ishinde qarjy piramidasynyń belgileri anyqtalǵan 56 uiym bar. Sonymen qatar 65 tulǵa bar. Atalǵan uiymdar el aýmaǵynda qarjylyq qyzmetti derbes júrgizedi nemese tiisti litsenziiasy joq degen kúdikke ie. Sol siiaqty olardyń jumysynda ruqsaty joq deldaldardy tarta otyryp usyný belgileri bar», - dedi Oleg Smoliakov.
