Qytaidaǵy koronavirýsty juqtyrý qaýpi ortasha jáne joǵary óńirlerdegi mektepter oqý jylynyń bastalýyn keiinge qaldyrady. Bul týraly Sinhýa agenttigi habarlady.
Bilim ministrliginiń ókili Liý Peitsziýnniń aitýynsha, COVID-19 taralýynyń aldyn alý men baqylaý aldaǵy semestrdiń basty basymdyǵy bolmaq. Mektep basshylary men jergilikti bilikke jaǵdaidyń barlyq yqtimal stsenariilerine muqiiat daiyndalý jáne oqý jylynyń birtindep jáne qaýipsiz bastalýyn qamtamasyz etý tapsyrylǵan.
Qytai aýrýhanalarynda koronavirýs juqtyrǵan 1812 adam jatyr, olardyń 527-si simptomsyz tasymaldaýshylar. Shilde aiynyń basynan bastap epidemiialyq qaýiptiligi joǵary turǵyn aýdandar sany birden 159-ǵa deiin ósti. Resmi túrde, QHR 730 jergilikti infektsiia jaǵdaiyn tirkedi (onyń ishinde 150 simptomsyz). Virýstyń aimaqtar boiynsha tez taralýyna bailanysty úkimet turǵyndarǵa qalalar arasynda múmkindiginshe az sapar jasaýdy usynady, al eldiń birqatar aimaqtarynda turǵyndardy koronavirýsqa aýqymdy testileý júrgizilýde.
