Ulttyq jáne memlekettik joǵary oqý oryndary oqytýshylarynyń jalaqysy 2021 jyldyń qyrkúieginen bastap ósedi, dep habarlady Bilim jáne ǵylym ministrliginiń baspasóz qyzmeti.
Endi oqytýshylar ai saiyn keminde 200 myń teńge jalaqy alady. Aǵa oqytýshynyń eńbekaqysy keminde 230 myń teńge, qaýymdastyrylǵan professor – 260 myń teńge, professor – 350 myń teńge (ulttyq joǵary oqý oryndarynda 400 myń teńge) alýǵa tiis.
Shtattaǵy oqytýshylarǵa minimaldy jalaqy mólsherin belgileý týraly tiisti buiryqqa bilim jáne ǵylym ministri Ashat Aimaǵambetov qol qoidy, dep habarlady ministrlik.
Osylaisha oqytýshylardyń jalaqysy ósti, olardyń oqý júktemesi kerisinshe tómendetiledi. Bir stavkanyń maksimaldy kólemi bir oqý jylynda 680 saǵattan aspaidy dep bekitildi. Bul oqytýshylardyń ǵylymi qyzmetpen ainalysýyna múmkindik berý úshin jasalyp jatyr.
"Josparly túrde oqytýshylar úshin jaily jaǵdai jasap, pedagogterdiń mártebesi men eńbekaqysyn arttyryp jatyrmyz. JOO oqytýshylarynyń jalaqysy da joǵarylaidy. Osylaisha joǵary oqý oryndary tarapynan sapaly jumysty, al oqytýshylardan oqý protsesine jaýapkershilikpen qaraýdy talap etemiz", - dedi bilim jáne ǵylym vitse-ministri Qýanysh Erǵaliev.
Aitýynsha, endi ár ýniversitet jalaqydan bólek basqa da yntalandyrý tólemderin belgilep, oqytýshylardyń belgili bir jetistigi úshin qosymsha aqy tólei alady.
