Jambyl oblysynda Qyrǵyz Respýblikasyna Memlekettik kirister komitetiniń shekteýinen tys táýligine 50 tonnadan asa janar-jaǵarmai kedergisiz ótýde, dep habarlaidy "Ult aqparat".
QR Sybailas jemqorlyqqa qarsy is-qimyl agenttiginiń Jambyl oblysy boiynsha departamenti basshysynyń birinshi orynbasary Ravil Tólebaev arnaiy monitoringtik top múshelerimen shekaradan ótý beketterinde júrgizgen qoǵamdyq monitoring qorytyndysyn jetkizdi.
«Shekara qyzmetiniń málimetine sáikes, ótkizý beketterinen ótetin naqty adam men kólik quraldarynyń sany áldeqaida kóp ekeni belgili boldy. Mysaly, «Qordai» beketi 1500 kólikti, 15 000 adamdy ótkizýge tiis bolsa, naqty 2300 kólik quraly men 22100 adam ótip jatyr», - dedi departament basshysy.
Sondai-aq, qoǵamdyq monitoring shekaradan ótetin adamdar men kólik sanynyń artýyna ne sebep bolǵanyn anyqtaǵan. Atap aitqanda, shekaradaǵy ótkizý pýnktileri arqyly Qyrǵyz Respýblikasyna AI-92 markaly janar-jaǵarmaidy jaiaý nemese jeńil avtokóliktermen avtokólik bagyna jáne qosymsha kanistralarǵa quiyp, bir kúnde 7-8 ret alyp ótý faktileri anyqtalypty. Bul jaǵdai Qyrǵyz Respýblikasynyń aýmaǵynda AI-92 markaly benzinniń bizden shamamen 72 teńgege qymbat bolýyna bailanysty qalyptasqan.
«Qazaqstan Respýblikasy Qarjy ministrliginiń Memlekettik kirister komitetiniń shekteýine qaramastan jalpy bir táýliktiń ishinde Qyrǵyz Respýblikasynyń aýmaǵyna avtokólikpen shamamen - 50 tonna, al jaiaý júre otyryp 5 tonna 250 litr janar-jaǵarmai ótip jatyr. Monitoring qorytyndysy Qazaqstan Respýblikasy Sybailas jemqorlyqqa qarsy is-qimyl agenttigine joldandy», - dedi Ravil Tólebaev.
