QR Ishki ister ministrligi tergeý departamentiniń bastyǵy Sanjar Ádilovtiń aitýynsha, biylǵy 9 aida adam saýdasyna qatysy bar 78 is sotqa joldanǵan, dep habarlaidy QazAqparat.
«Biylǵy 9 aida ishki adam saýdasyna qatysty 200 qylmystyq is boldy. Onyń ishinde 78-i sotqa joldandy. Qalǵandary boiynsha tergeý jalǵasyp jatyr. 26 adamǵa qatysty ártúrli jazany taǵaiyndai otyryp, aiyptaý úkimi shyǵaryldy», - degen tergeý departamentiniń bastyǵy sońǵy úsh jylda jyl saiyn adam saýdasynyń 90 qurbany anyqtalǵanyn atady.
«Onyń 20-sy májbúrli eńbekke tartylǵan», - dedi ol ortalyq kommýnikatsiialar qyzmetinde ótken brifingide.
IIM ókiliniń sózine qaraǵanda, «adam eksporty» Aziiadaǵy 6 elge baǵyttalyp otyrǵan.
«Bul rette Katar, Indoneziia, Bahrein, Birikken Arab Ámirlikteri, Túrkiia jáne Ońtústik Koreiada paidalaný maqsatyn kózdeitin segiz arna, sondai-aq Ózbekstan men Qyrǵyzstannan adam ákeletin eki import dálizi joiyldy. Mysaly, biyl biz Qazaqstan Respýblikasynyń, Resei Federatsiiasynyń jáne Bahrein Koroldiginiń azamattarynan quralǵan 19 adamdyq transulttyq uiymdasqan topqa qatysty tergeýdi aiaqtadyq. Bahreinge jynystyq qanaý úshin tartylǵandardyń arasynda kámeletke tolmaǵandar da bar. Zardap shekkenderdiń jalpy sany 39-ǵa jetti. Qazirgi ýaqytta qylmystyq is sotta qaralyp jatyr», - dedi Sanjar Ádilov.
