Nur-Sultan qalasy qoǵamdyq densaýlyq saqtaý basqarmasynyń basshysy Sáýle Qisyqova KVI juqtyrǵan naýqastardyń qalai emdeletinin túsindirdi, dep habarlaidy QazAqparat.
«Koronavirýs infektsiiasy anyqtalǵanda azamattardy aýrý belgisi bar jáne joq dep bólemiz. Olar (KVI belgisi joq adamdar – red.) aýrý adam emes, tek osy virýsty tasymaldaýshy bolyp sanalady. Olardy emdeý qajet emes. Al ekinshi top – aýrý belgisi bar adamdar bizdiń hattamaǵa sáikes em alady. Ár adam JRVI, tumaý nemese KVI belgisi bar bolsa, mindetti túrde test tapsyrýy qajet», - dedi basqarma basshysy Ortalyq kommýnikatsiialar qyzmetinde ótken onlain brifingte.
Mamannyń aitýynsha, KVI anyqtalǵan adamdarǵa dárigerler arnaiy em jazyp beredi. Olar úide immýnitet kóterip, túrli vitaminder ishý qajet. Jáne emdi mindetti túrde dárigerdiń keńesine sáikes alý kerek.
Sonymen birge, QR Densaýlyq saqtaý ministriniń zerthanalyq qyzmet boiynsha keńesshisi Janar Súleimenova turǵyndarǵa ózdiginen em-dom jasamaýǵa keńes berdi.
«Árbir patsient Bastapqy meditsinalyq-sanitarlyq kómek kórsetý uiymyna tirkelgen jáne emhanadaǵy mamandar baqylaý júrgizedi. Sondyqtan, úide em-dom jasamaýǵa keńes beremin. Koronavirýs anyqtalǵan, biraq simptomy joq adamdar óz jaǵdaiyn baqylap, dene qyzýyn ólsheýi tiis. Entigý, dene qyzýynyń 38 gradýsqa jetýi, álsizdik syndy belgiler baiqalsa, birden jedel jáirdemge habarlasý qajet», - dedi Janar Súleimenova.
