Qazaqstan Ulttyq Bankiniń Tóraǵasy Erbolat Dosaev pen Halyqaralyq valiýta qorynyń Basqarýshy direktory Kristalina Georgieva HVQ men Dúniejúzilik Bank tobynyń kóktemgi kezdesýleri aiasynda onlain kezdesý ótkizdi, dep habarlaidy "Ult aqparat".
Taraptar qazirgi makroekonomikalyq ahýaldy, COVID-19-dyń Qazaqstan ekonomikasyna teris saldaryn azaitý maqsatynda daǵdarysqa qarsy sharalardyń júzege asyrylýyn, aqsha-kredit saiasaty máselelerin, sondai-aq eldiń qarjy sektoryn odan ári damytý máselelerin talqylady.
Virtýaldy kezdesý barysynda HVQ tarapynan makroboljamdaýdy, stress-testileýdi, kiberqaýipsizdikti jáne táýekel-menedjmentti damytý boiynsha tehnikalyq kómek kórsetý máselesi qaraldy, sonymen qatar 2021 jyldyń kúzinde Qazaqstannyń qarjy naryǵyna keshendi baǵalaý júrgizý múmkindigi pysyqtaldy.
Kezdesýdi qorytyndylai kele Qazaqstan Ulttyq bankiniń Tóraǵasy Erbolat Dosaev pen HVQ Basqarýshy direktory Kristalina Georgieva Kavkaz, Ortalyq Aziia jáne Mońǵoliia memleketterine arnalǵan áleýetti damytý óńirlik ortalyǵynyń onlain-vebinarlarlary tabysty ótkenin aitty jáne onyń jyl sońyna deiin Almaty qalasynda is júzinde ashylýyna qatysty máselelerin talqylady.
