Qostanai oblysynyń Óńirlik kommýnikatsiialar qyzmetinde oblystyq Veterinariia basqarmasy basshysynyń orynbasary Baýyrjan Beket aimaqtaǵy qus tumaýynyń taralýyna qatysty brifing ótkizdi, dep habarlaidy "Ult aqparat".
Baýyrjan Bekettiń aitýynsha, osydan on kún buryn Veterinariia boiynsha ulttyq referenttik ortalyǵy eldi mekenderde ólgen qustardyń patologiialyq materialdaryn diagnostikalyq zertteýden ótkizdi. Sonyń nátijeleri boiynsha oblys aýmaǵynda «joǵary patogendi qus tumaýy» diagnozy qoiyldy.
«Osyǵan bailanysty veterinarlar infektsiia oshaqtarynda epizootologiialyq tekserý júrgizdi jáne aktilerin QR AShM veterinariia basqarmasy oblystyq aýmaqtyq inspektsiiasyna usyndy. Qostanai oblysynyń bas memlekettik veterinariialyq-sanitariialyq inspektorynyń usynysy boiynsha Meńdiqara aýdanynyń Krasnaia Presnia, Sarykól aýdanynyń Maiak, Taǵyl, Uzynkól aýdanynyń Sokol, Arqalyq qalasynyń Rodina, Fýrmanov, Altynsarin aýdanynyń Priozernoe, Qarabalyq aýdanynyń Mihailov aýyldarynda karantin belgilendi. Atalǵan eldi mekenderdiń kireberisinde blok-beketter ornatyldy, qustar men qus sharýashylyǵy ónimderin shyǵarý toqtatyldy. Infektsiia oshaqtarynda órteý, úi-jailardy dezinfektsiialaý jolymen ólgen qustardyń ólekselerin joiý boiynsha is-sharalar júrgizildi. Epizootiiaǵa qarsy jáne epidemiiaǵa qarsy is-sharalardy uiymdastyrýdy úilestirý úshin oblystyq Tótenshe jaǵdailar departamenti janynan ahýal ortalyǵy quryldy», - dedi Baýyrjan Beket.
Respýblikalyq qordan qus tumaýyna qarsy vaktsinanyń 366218 danasy kelip tústi. Qustardy vaktsinatsiialaý eldi mekenderden 25 kilometr radiýsta býferlik aimaqta jalǵasady.
«Oblys boiynsha egilgen qustardyń jalpy sany 429 801 basty quraidy. BAQ, internet-resýrstar arqyly halyq arasynda profilaktikalyq is-sharalar, qunyn óteý máseleleri boiynsha túsindirý jumystary júrgiziledi. Oblystyń jergilikti atqarýshy organy qus tumaýyn turaqtandyrý jáne odan ári taralýyn boldyrmaý jóninde barlyq qajetti sharalardy qabyldaýda», - dep túsindirdi basqarma basshysynyń orynbasary.
