Soltústik Qazaqstan oblysynda qus tumaýynyń taralýyna bailanysty mamandar turǵyndarǵa birqatar saqtyq sharasyn ustaný qajettigin eskertedi. Óitkeni bul aýrý adamǵa juǵady, dep habarlaidy "Ult aqparat".
Joǵary patogendi qus tumaýy adam úshin qaýipti.
Mamandardyń aitýynsha, negizinen ol aýrý qustyń eti men jumyrtqasyn paidalanǵannan juǵady.
«Qandai bolmasyn virýs 70 gradýstan artyq ystyq temperatýrada óledi. Sol sebepti shikidei pisken jumyrtqany jeýge bolmaidy. Kimniń immýniteti nashar, tynys alý músheleriniń sozylmaly aýrýlary bar – olar da qus tumaýyn juqtyryp, aýrýy múmkin. Buǵan deiin de óńirde qus tumaýy tirkeldi. Alaida ázirshe adamdar ony juqtyrǵan joq», - deidi QR AShM Veterinarlyq baqylaý jáne qadaǵalaý komitetiniń oblystyq aýmaqtyq ispektsiiasynyń jetekshisi Marat Ibraev.
Qus tumaýyn juqtyrǵan adamda onyń belgileri tek úsh kúnnen keiin ǵana biline bastaidy. Kádimgi tumaýdan aiyrmashylyǵy joq: adamnyń dene qyzýy kóteriledi, býyndary syrqyrap aýyryp, tamaǵy qyzarady, jótel paida bolady. Keide koniýktivit paida bolady eken.
«Aýrý asqynǵan jaǵdaida ókpe-júrek jetispeýshiligi paida bolady. Ókpe isip, pnevmoniiaǵa ulasýy múmkin. Qan tamyrlarynyń jumysy buzylyp, ish ótedi, qusyp, mi isinip ketedi. Qus tumaýyn juqtyrǵan adam ádettegi tumaýdaǵy preparattarmen emdeledi», - deidi SQO taýarlar men kórsetiletin qyzmetterdiń sapasy men qaýipsizdigin baqylaý departamentiniń bólim basshysy Iýliia Gaisina.
Mamandardyń aitýynsha, qus tumaýynyń aldyn alýǵa bolady. Ol úshin qusty qamap ustaý qajet. Al aýrýdyń belgileri paida bolǵan jaǵdaida birden veterinar mamandarǵa habarlaǵan jón. Qusty baǵýǵa kietin arnaiy kiim bolýy qajet. Ony únemi jýyp, tazalap otyrǵan jón.
«Qusqa beriletin jemazyqty jabaiy qustar kirmeitindei jabyq ustaý kerek. Al qus eti men jumyrtqasyn ruqsat etilmegen jerlerde saýda jasaýshylardan almaý qajet. Sýdy qainatyp ishýge nemese bótelkedegi sýdy paidalanýǵa keńes beremiz. Qoldy jii jýyp, maska taǵyńyz jáne bir rettik sýlyqtardy paidalanyńyz. Jalpy tumaýdan saqtanýdyń jaqsy joly – arnaiy ekpe ekkizý. Al aýrýdyń alǵashqy belgileri paida bolǵan jaǵdaida birden dárigerge kóringen jón», - deidi Iýliia Gaisina.
