Búgin Jambyl oblysy ákimi Asqar Myrzahmetovtyń tóraǵalyǵymen qurylys nysandarynyń sapasyn baqylaý júiesine qatysty jiyn ótti.
2018 jyldyń maýsym aiynda kásipkerlerdi qoldaý jóninde keibir zań aktilerine ózgerister engizilip, qurylys salasyndaǵy atqarylyp jatqan jumystardyń sapasyn tekserý boiynsha birqatar quzyrettilikter qysqartylǵan.
Oblys ákiminiń tikelei tapsyrmasyna sáikes, óńirdegi qurylys nysandaryna baqylaýdy kúsheitý maqsatynda «Zańsyz, negizgi qujattarsyz jáne sapasyz qurylystardy boldyrmaý is-sharalar jospary» ázirlenip, bekitildi.
2018 jyly qurylys sapasyna qatysty 168 ákimshilik is qozǵalǵan bolsa (aiyppul somasy 18,1 mln. tg), onyń 114-i nemese 68 paiyzy (aiyppul somasy 12 mln. tg) atalǵan is-shara nátijesinde anyqtalǵan. A.j. alǵashqy toqsanynyń ózinde 89 is qaralsa (aiyppul somasy 9,2 mln. tg), onyń 74-i nemese 83 paiyzy (aiyppul somasy 8 mln. tg) is-shara nátijesine belgili bolǵan.
Oblys ákimdigi memlekettik sáýlet-qurylys baqylaý basqarmasy tarapynan oblys aýmaǵyndaǵy litsenziattardyń elektrondy derekter bazasy qurylyp, litsenziattar boiynsha barlyq málimetter engizilýde. Nátijesinde oblysta tirkelgen 1500 litsenziattyń 700-i qysqartyldy. Iaǵni, búgingi kúni Jambyl oblysyndaǵy qurylys salasyndaǵy litsenziattardyń sany 800-di qurap otyr. Atalǵan derekter bazasy qurylys salasyndaǵy aty bar da zaty joq mekemelerdiń litsenziia alýyna shekteý qoiýǵa múmkindik berip otyr.
Al, bul óz kezeginde qurylys sapasynyń artýyna septigin tigizeri sózsiz. Jiynda oblys ákiminiń tapsyrmasyna sáikes qurylyp, qoldanysqa engizilip jatqan óńirdegi «Qurylys nysandarynyń elektrondy derekter bazasynyń» tiimdiligi, paidaly tustary keńinen sóz boldy.
Derekter bazasy monitoring júrgizýdi, qyzyl syzyqtyń saqtalýyn, qurylys mádenietin, zańdylyǵyn, sapasyn qamtamasyz etip, qurylys nysandarynyń bastalǵan kúninen paidalanýǵa berilgenge deiingi aralyqta baqylaýǵa, qurylys kólemin anyqtaýǵa, zań buzýshylyqtardyń aldyn alýǵa tolyq múmkindik beredi.
Asqar Isabekuly júrgizilip jatqan árbir qurylystyń sapaly atqarylýy adam ómiriniń qaýipsizdigimen bailanysty ekenin basa aityp, bul baǵyttaǵy jumystar qashanda nazardan túspeý kerektigin eskertti. Óńir basshysy merdigerlerdiń qurylys jumystaryn baqylaý sharalaryna tapsyrys berýshilermen qatar aýyldyq okrýg ákimderi de barynsha atsalysý kerektigin tilge tiek etti.
Sonymen qatar, qurylysy aiaqtalyp, paidalanýǵa tapsyrylǵan nysandardyń kepildik merzimi aralyǵynda paidalaný kezindegi sapasyna júieli túrde monitoring júrgizýdi tapsyrdy.
