Shymkenttik Qurmet Talapqazy bastaǵan eriktiler Mańǵystaýdaǵy qýańshylyqtan jutaǵan elge arnap daiyndaǵan kómektiń alǵashqy legin jetkizip berdi, dep habarlaidy QazAqparat.
Qurmet Talapqazynyń bastamasy talai jandy beijai qaldyrmaǵanyn budan buryn jazǵan edik. Áýelde talai adam iske asatynyna kúmánmen qaraǵan «Mańǵystaýǵa shóp kómek» naýqany keń etek jaiyp keledi. Top jetekshisi Qurmet Talapqazy 10 vagon shópti Mańǵystaýǵa ózi arnaiy baryp, jetkizip berdi. Endi bul istiń basy-qasyndaǵy eriktilerdi «bastamashyl top» dep ataýdyń ózi durys bolmaityn siiaqty. Óitkeni bastama respýblikalyq aýqymǵa shyǵyp otyr. Ony bir aptadan beri Qurmettiń qolyn uzartyp, shóp jinaý jumystaryn uiymdastyryp júrgen taldyqorǵandyq Muratbek Soltanbai aitty. Qarapaiym aýyl turǵyndarynan bólek, iri kásiporyndar da bailanysqa shyǵyp, kómek usyna bastaǵan kórinedi. Almaty oblysynyń aýyldary «Saryaǵash jaqta shóp bitse, bizge kelińder» dep duǵai sálem joldapty. Al Shyǵys Qazaqstannyń bir azamaty jalǵyz ózi 10 vagon shóp basyp berýge daiyn ekenin aityp, shaqyrǵan kórinedi. «Qostanaidaǵy traktor shyǵaratyn «Eýraziia-gýrpp» kompaniiasynyń basshylary bailanysqa shyǵyp, Saryaǵashqa bir traktordy shóp presteitin tehnikasymen birge jibergenderin aitty. Qajet bolsa, basqa óńirlerge de jiberemiz, qansha tehnika kerek ekenin aityńdar dep otyr. Ol traktor kúzge senderdiń ielikterińde bolsyn dep qýantty», - deidi Muratbek Soltanbai.
Sonymen Mańǵystaýǵa 10 vagon shóp jetti. Bir ai boiy ońtústiktegi aǵaiynnyń taban et, mańdai terimen jinalǵan jemshóp mańǵystaýlyqtarǵa talan-tarajǵa túspei úlestirilýi úshin jergilikti jurt ishinen birneshe jigit iriktelip, baqylaý solarǵa júktelgen eken. Solardyń biri Muhanbet Boranbaev bir ǵana Beineý aýdanyna qarasty Tólep, Syńǵyrlaý, Tájen, Aqjigit, Sam, Noǵaity, Turysh, Sarǵa, Eset, Boranqul eldi mekenderiniń ishindegi sanaýly muqtaj jandarǵa taratylǵanyn aitady. «Ár otbasyǵa 10 tekshe úlestirgende, 130-140 úige berildi», - deidi erikti.
Mańǵystaýǵa jetken 10 vagon shóptiń alǵashqy beseýine 1mln 975 myń teńge tólegen bolatyn. Keiingi 5 vagondy tasymaldaýshylar tegin usynǵan eken. Qazir eriktiler jinaǵan 10 vagon shóp óz kezegin kútip otyr. 5 vagon shóp tielip qoiǵanymen, vagon ieleri aqy surap otyrǵan kórinedi. «Alǵashqy 5 vagonnyń árqaisysyna 395 myńnan tólep jibergen edik. Keiingiler tegin bolady dep qýantqan. Ekinshi lek osylaisha tegin jetkizildi. Al úshinshi lek keshe túnde shyǵyp ketýi kerek edi. Tasymaldaýshylar aitqandarynan ainyp, ár vagonǵa 500 myń teńge tóleńizder dep otyr. Onyń ústine shóp tielgen vagondardyń qańtarylyp turǵany úshin ár vagonǵa ósimpul tóleý kerek eken. Basynda tegin bolady degenge senip, tiep tastaǵan edik. Endi jerdegi 5 vagon shópti tietýden qorqyp otyrmyz. Táp-táýir bastalǵan is osylaisha kedergige tap boldy», - deidi osy iste jastarǵa bas-kóz bolyp, baǵyt siltep júrgen Sailaýbai qajy Meiirbekov.
Qurmet Talapqazy buǵan bola týyn túsirmeitinin aitty. «Qarapaiym halyqtyń bir-birine degen janashyrlyǵyn kórip turyp, orta joldan qaitpaimyn. Tipti sonaý Resei men Monǵoliianyń qazaqtary habarlasyp, kómek usynyp jatyr. Bul jumys Saryaǵashpen ǵana toqtalmaidy. Buiyrsa, Almaty oblysyna, keiin Shyǵys Qazaqstanǵa kóship, sol jaqtan jemshóp jinaimyz. Oral jaqtan da shaqyryp jatqandar bar. Qar túskenshe tynym tappaimyz dep sheshtik. Óitkeni jutaǵan malǵa áli kóp azyq jinaý kerek. Mańǵystaýdy birshama qamdasaq, Qyzylorda oblysynyń Aral aýdanyna da kómekteskimiz keledi», - deidi Qurmet Talapqazy.
