Búgin Aýyl sharýashylyǵy ministri Erbol Qarashókeev qurǵaqshylyqqa tap bolǵan elimizdiń óńirine elden kómek jinap, qolmen shóp shaýyp tasyǵan Qurmet Talapqazyny marapattady, dep habarlaidy QazAqparat.
Belgili bolǵandai, QR Aýyl sharýashylyǵy ministri E. Qarashókeev Qurmet Talapqazymen kezdesip, «Qurmet» gramotasyn tabystady.
«Qurmettiń esimi muqym qazaqqa belgili. Mańǵystaýda mal qyrylyp jatqanda barsha qazaqstandyqtarǵa úndeý tastap, igi bastamany qolǵa aldy. Ministr Qurmettiń bastamasyn qoldap qoimai, ony júzege asyrýǵa kómektesken bolatyn. Shabylǵan shópti Mańǵystaýǵa jetkizý úshin ákimdiktermen, QTJ syndy basqa da mekemelermen kelissóz júrgizip, vedomstvo tarapynan qajet qoldaýdy kórsetti. Búgin sáti túsip, sharýalarmen kezdesý barysynda júzbe júz kezdesti. Qazaqta bas kóteretin, aýyldyń máselesine bei-jai qaramaityn azamattar kóp bolsyn!», - dep jazdy Aýyl sharýashylyǵy ministrliginiń baspasóz hatshysy áleýmettik jelidegi paraqshasynda.
Eske salsaq, Shymkent qalasynyń 25 jastaǵy turǵyny Qurmet Talapqazy elimizdiń batysyndaǵy qýańshylyqqa tap bolǵan maldy aýyldarǵa jem-shóp jiberý úshin búkil jumysyn tastap, qoǵamdyq bastamaǵa muryndyq bolǵan edi.
Jaqynda oǵan Shymkenttegi ýniversitette tegin oqý múmkindigi berildi.
