Qurlyq áskerleri birqatar jaýyngerlik oqý-jattyǵý tapsyrmalaryn oryndady. Áskerlerdiń jaýyngerlik ázirligi, áskeri qyzmetshilerdiń jańa jaǵdaida, beitanys jerde áreket etý qabileti tekseriledi, dep habarlaidy QR QM baspasóz qyzmeti.
Aqtaý mańyndaǵy «Oimasha» poligonynda bólimsheler men bólimder arnaiy áskeri operatsiia ótkizdi. Tapsyrmalardy oryndaý kezinde áskerlerdi basqarý máseleleri pysyqtalyp, jaýyngerlik is-qimyldardy júrgizýdiń jańa túrleri men ádisteri qoldanyldy.
Almaty oblysyndaǵy «Kóktal» taý poligonynda shartty zańsyz qarýlanǵan quramalar joiyldy. Desanttyq-shabýyldaý áskerleri qolbasshysynyń basshylyǵymen taý jotalarynyń jetýi qiyn ýchaskelerinde barlaý-izdestirý is-qimyldary júrgizildi. Desantshylar Shekara qyzmetiniń bólimshelerimen birlesip, sodyrlardyń jarýy yqtimal baǵyttary boiynsha memlekettik shekarany kúzetýdi kúsheitti. TJM, Ishki ister jáne Ulttyq qaýipsizdik organdarymen ózara is-qimylda bosqyndar lagerleri ashylyp, qajetti infraqurylym quryldy.
Shyǵys Qazaqstandaǵy «Shyǵys» poligonynda kúsheitilgen mehanikalandyrylǵan brigada manevrlik qorǵanysty júrgizý, sondai-aq bólimshelerdi qorshaýdan shyǵarý tapsyrmalaryn oryndady.
Áýe qarsylasynyń soqqylaryn toitarýǵa, búrkemeleýge, uiymdasqan túrde josparlanǵan qorǵanys shepterine oryn aýystyrýǵa, qarsylastyń ainalyp ótetin jáne reidtik jasaqtaryn joiýǵa erekshe nazar aýdaryldy.
Qyzylorda oblysyndaǵy «Tereńózek» poligonynda barlaýshylar qarsylastyń obektilerin anyqtaý jáne eldimeken mańynda sodyrlardy joiý kezinde aviatsiia soqqylaryn jáne artilleriia atysyn dáldep túzetý máselelerin pysyqtady. Tikushaqtardyń kómegimen barlaý toptary shartty qarsylastyń tylyna qondy. Barlaýshylardy qaýipsiz jerlerge kóshirý sharalary da qatar uiymdastyryldy.
Tájiribe kórsetkendei, jaýyngerlik oqý-jattyǵý tapsyrmalaryn oryndaý sapasy komandirlerdiń qysqa merzimde neǵurlym ońtaily sheshim qabyldaý qabiletine bailanysty. Qarýly Kúshterdiń Bas shtaby komandalyq quram men áskerlerdiń daiarlyq deńgeiin baǵalaidy.
Áskerlerdi qaýyrt tekserý 23 qyrkúiekke deiin jalǵasady. Buǵan 9 myńǵa jýyq jeke quram, 3 myńnan astam qarý-jaraq pen áskeri tehnika, onyń ishinde 66 ushý apparaty men 8 korabl qatysady.
