Foto: kontakt-express.ru
Astanada 78 jastaǵy zeinetker 6 mln teńgesin shetel azamatyna bere salǵan. Alaiaqtyq jasady degen kúdikti ustaldy, dep habarlaidy qalalyq politsiia departamenti.
Politsiia departamentiniń málimetine súiensek, zeinetkerge beitanys nómirden belgisiz adam qońyraý shalyp, ózin Ulttyq banktiń qaýipsizdik qyzmetiniń qyzmetkeri retinde tanystyrǵan. Ol zeinetkerdi kúmándi qarjylyq operatsiialar anyqtalǵanyn aityp, aqshany "saqtaý" úshin berý qajet ekenine sendirgen.
Jábirlenýshi kúdiktiniń nusqaýyn oryndap, 6 mln teńgeni kýrerge tabystaǵan. Al kýrer qarajatty belgisiz tulǵaǵa bergen. Biraz ýaqyttan keiin áiel adam aldanǵanyn túsinip, politsiiaǵa júgingen.
Anti-Fraud jedel-profilaktikalyq is-sharasy barysynda politsiia qyzmetkerleri 33 jastaǵy shetel azamatyn anyqtap, ustady. Kúdikti ýaqytsha ustaý izoliatoryna qamaldy.
"Atalǵan derek boiynsha sotqa deiingi tergep-tekserý júrgizilýde. Qylmysqa qatysy bar ózge tulǵalar anyqtalýda", - delingen habarlamada.
Politsiia azamattardy qyraǵy bolýǵa jáne aqshalai qarajatty beitanys tulǵalarǵa bermeýge shaqyrady. Bank jáne quqyq qorǵaý organdarynyń qyzmetkerleri eshqashan qolma-qol aqshany kýrer arqyly berýdi talap etpeidi.
