Áleýmettik jeliler men jekelegen aqparattyq pablikterde Qazaqstanda kýrer retinde qosymsha jumys isteitin analardy áleýmettik tólemderden aiyrý jospary týraly jariialanymdar taralýda. Eńbek jáne halyqty áleýmettik qorǵaý ministrligi bul shyndyqqa sáikes kelmeitinin málimdedi, dep habarlaidy ult.kz.
Vedomstvo málimetinshe bala kútimin júzege asyratyn jumys istemeitin ata-analarǵa respýblikalyq biýdjet qarajaty esebinen bala bir jarym jasqa tolǵanǵa deiin memlekettik áleýmettik járdemaqy (MÁJ) tólenedi. Atalǵan járdemaqylar shartsyz, jáne alýshynyń keiinnen jumysqa ornalasýyna qaramastan, bala bir jarym jasqa tolǵanǵa deiin tolyq merzimde tólenedi.
Óz kezeginde, mindetti áleýmettik saqtandyrý júiesiniń qatysýshylary bolyp tabylatyn turaqty jumysy bar ata-analarǵa Memlekettik áleýmettik saqtandyrý qorynan bala bir jarym jasqa tolǵanǵa deiin onyń kútimine bailanysty tabysynan aiyrylǵan jaǵdaida áleýmettik tólemder taǵaiyndalady. Bul tólemniń mólsheri bala týǵan kúnge deiingi sońǵy eki jyldaǵy ortasha ailyq tabystyń 40 paiyzyn quraidy.
Qazaqstan Respýblikasynyń Áleýmettik kodeksiniń normalaryna sáikes, atalǵan tólemderdi jumysqa shyǵýyna bailanysty toqtatý tek alýshynyń óz erkimen tiisti ótinish berýi arqyly ǵana júzege asyrylady.
"Buqaralyq aqparat quraldarynyń ókilderi, blogerler men pablik ákimshileri resmi málimdemelerdi túsindirýge muqiiat qarap, azamattardy jańylystyrýy múmkin taqyryptar men tujyrymdardan aýlaq bolýy qajet.
Azamattardy ýákiletti memlekettik organdardyń resmi túsindirmelerine ǵana súienýge shaqyramyz. Qandai da bir suraqtar týyndaǵan jaǵdaida aqparatty naqtylaý úshin tikelei beiindi vedomstvolarǵa júgingen jón", - delingen habarlamada.
