Qazaqstan musylmandary dini basqarmasynyń tóraǵasy, bas múfti Naýryzbai qajy Taǵanuly qazaqstandyqtardy Qurban ait meiramymen quttyqtady, dep habarlaidy "Ult aqparat".
***
Asa Qamqor, erekshe Meiirimdi Allanyń atymen bastaimyn!
Qadirli jamaǵat!
Barshańyzdy ulyq meiram – Qurban aittyń kelýimen shyn júrekten quttyqtaimyn! Ait qabyl bolsyn! Sizderge amandyq pen saýlyq, birlik pen bereke tileimin.
Qurban ait – shynaiy niet pen Allaǵa degen súiispenshilikti pash etetin meiram. Ulyq merekeniń tárbielik máni men maǵynasy osynda jatyr. Qasietti Quranda: «Umytpańdar, olardyń eti de, qany da eshqashan Allaǵa jetpeidi. Oǵan jetetin nárse – júrekterińizge uialaǵan taqýalyqtaryń (shynaiy nietteriń)» («Haj» súresi, 37-aiat), – delingen. Aiatta aitylǵandai, Qudai jolynda jaqsylyq jasaýǵa niettengen pende bul amaldy riiasyz oimen oryndaidy.
Adam balasy qurbandyq shalý arqyly Allanyń bergen rizyq-nesibesine shúkir etedi. Qudaidyń násip etken nyǵmettiń bir bóligin kómekke muqtaj jandarǵa úlestirip, olardyń da aqysyn berip, qýanyshqa bóleidi. Óitkeni, Paiǵambarymyz Muhammed (oǵan Allanyń salaýaty men sálemi bolsyn): «Paryz amaldan keiingi Allaǵa unamdy is – musylmannyń júregine qýanysh syilaý» degen.
Halqymyz «Bota alǵansha bata al» deidi. Úlkenniń, jalpy kómekke muqtaj jandardyń alǵysyn alyp, batasyna bólený – ait kezinde oryndalatyn saýapty istiń biri. Musylman balasynyń ulyq kúnde shynaiy nietpen qurban shalyp, qurbandyq etin múgedekter men jetimderge, kópbalaly otbasylar men qarttarǵa taratyp, olardyń alǵysyn alýǵa tyrysatyny sondyqtan.
Osy rette elimizdegi barsha kásipker azamattardy Qurban aittyń qurmetine mal qunyn qoldan kótermei, halyqtyń áleýmettik jaǵdaiyn eskerip, ońtaily baǵa usynýǵa, jurt kúnde tutynatyn azyq-túlikke múmkindiginshe jeńildik jasaýǵa shaqyramyn. Qurban aittyń negizgi máni musylmandar arasynda ózara meiirimdilik, jomarttyq, qaiyrymdylyq, qanaǵat syndy adamgershilik qundylyqtardy qalyptastyrý ekenin esten shyǵarmaǵan abzal. Allanyń raqym nury tógiletin aitta jurtymyzǵa jaqsylyq jasap, kópshiliktiń rizashylyǵyna bóleneiik.
Qurmetti otandastar!
Búginde álem musylmandary eki jylǵa sozylǵan úzilisten keiin úlken qajylyq jasaýda. Solardyń qatarynda Mekke qalasynda qajylyq paryzyn ótep júrgen 4 myń otandasymyzdyń nieti men duǵasy qabyl bolyp, elimizge aman-esen oralýyn tileimiz.
Alla Taǵala elimiz ben jerimizge berekesin jaýdyryp, shalǵan qurbandyqtarymyzdy, bergen sadaqalarymyzdy, ait kúnderi amalǵa asyrǵan Allaǵa unamdy árbir igi isterimizdi qabyl etkei.
Aittan aitqa aman-esen jete bereiik. Ámin!
