Biologiialyq qaýipsizdikti boljaý ulttyq júiesin qurý ýaqyt talaby. Mundai pikirdi QR Prezidentiniń Joldaýyna orai QazVac vaktsinasyn ázirleýshi Kúnsulý Zakariia bildirdi, dep habarlaidy QazAqparat.
Memleket basshysy Qasym-Jomart Toqaev «Halyq birligi jáne júieli reformalar – el órkendeýiniń berik negizi» atty halyqqa Joldaýynda Biologiialyq qaýipsizdik problemalary institýty ǵylymdary ázirlegen jáne óndirgen otandyq QazVac vaktsinasyn joǵary baǵalai kele: «Qazaqstan – koronavirýsqa qarsy vaktsina jasap shyǵarǵan álemdegi sanaýly memlekettiń biri. Bizdiń vaktsinamyzdyń tiimdi ári qaýipsiz ekenine esh kúmán joq. Qazir QazVac-qa ózge memleketter de suranys bildirýde» dep atap ótti. Biologiialyq qaýipsizdik problemalary ǴZI ujymy Memleket basshysynyń Joldaýyn, ásirese elimizdiń biologiialyq qaýipsizdik máselelerin kúsheitý týraly tapsyrmasyn ystyq yqylaspen qabyl aldy. Qazirgi ýaqytta eldiń biologiialyq qaýipsizdigin boljaý ulttyq júiesin qurý – bul ýaqyt talaby. Atalǵan júie biologiialyq qaýipsizdikke tónýi múmkin qaýip-qaterge shuǵyl áreket etýge múmkindik beredi», - dedi Kúnsulý Zakariia.
Sonymen qatar ǵalym «Salamatty ult» ulttyq jobasy aiasynda keminde 12 zerthana joǵary tehnologiialy quraldarmen jabdyqtalatyndyǵy aitylǵandyǵyn atap ótedi.
«Bul óte mańyzdy. Óitkeni,memlekettiń basty mindeti - azamattardyń densaýlyǵyn qamtamasyz etý. Memleket basshysy tapsyrmasy sanitarlyq-epidemiologiialyq zerthanalardy halyqaralyq standarttar deńgeiine arttyrýǵa jáne otandyq farmatsevtika salasyn kóterýge múmkindik beredi. Keshe Premer-Ministrdiń orynbasary Eraly Toǵjanovtyń basshylyǵymen Biologiialyq qaýipsizdik máseleleri jónindegi keńestiń otyrysyna qatystyq. Onda Memleket basshysynyń Qazaqstan halqyna Joldaýyndaǵy eldiń biologiialyq qaýipsizdigin qamtamasyz etýge qatysty bergen tapsyrmasy talqylandy. Biologiialyq qaýipsizdik problemalary ǴZI Memleket basshysynyń biologiialyq qaýipsizdikti qamtamasyz etýge jáne farmatsevtika salasyn damytýǵa qatysty saiasatyn tolyqtai qoldaidy ári árbir tarmaǵyna Qazaqstannyń damýy men bolashaǵy úshin óz úlesin qosýǵa daiyn», - dedi ol.
