Bas redaktorlar klýby elimizdegi barlyq buqaralyq aqparat quraldaryna úndeý joldady, dep habarlaidy "Ult aqparat".
Úndeýdi Bas redaktorlar klýbynyń jetekshisi Bibigúl Jeksenbai Facebook paraqshasynda jariialady.
«Elimizdegi barlyq buqaralyq aqparat quraldaryna, telearnalar men internet basylymdarǵa, áleýmettik jelidegi jekemenshik sait ieleri men blogerlerge úndeý joldaimyz. Búgingi tańda búkil álem emi tabylmai otyrǵan qaýipti indettiń taralýynan sheti men shegi kórinbeitin, taýdai tolqyndary doldana týlaǵan teńizde tórt qubylasynan tynyshtyq taptai teńselgen kemedei kúrdeli kezeńdi bastan keship otyr. Qara túnek qyspaqtan qutylýdyń jalǵyz joly – sónbegen úmittei bolyp alystan jyltyrap, basty baǵytqa jol silteitin shamshyraqtyń janyp-óshken álsiz jaryǵy. Bizdiń qoǵam da keme sekildi. Al endi qoǵamdy qiyndyqtan alyp shyǵar shamshyraq – ol aqparat quraldary. HH ǵasyrdyń basyndaǵy ult ustazy Ahmet Baitursynovtyń «Gazet – halyqtyń kózi, qulaǵy hám tili» deýi de tegin emes edi. Dál osy aksiomanyń búgingi aqparat dáýirinde quny artpasa, kemimesi anyq. Óitkeni, qiyndyqqa tap bolǵan qoǵamnyń dertinen arylyp, denesin tiktep, baǵdaryn aiqyndaý úshin shynaiy aqparattyń aýadai qajet ekenin tarlan tarih talai dáleldegen. Al jalǵan aqparattyń qateri indetten jaman ekeni de shyndyq» delingen úndeýde.
Sondyqtan Bas redaktorlar klýby kún saiyn qanshama otbasy qimasynan aiyrylyp, qara jamylyp otyrǵanda efirlerden toi toilaǵandai tairańdaǵan, bi bilegendei sekeńdegen tok-shoýlardy kórsetý basqasyn bylai qoiǵanda, adamgershilik qaǵidalarymen qabyspaitynyn aitady.
«Onyń ornyna taqyryptyq, tanymdyq dúnielerdi halyqqa usynsaq durys bolar edi dep oilaimyz. Qai zamanda bolsyn aqparat quraldary memlekettik ideologiianyń basty salasy bolyp sanalady. Sondyqtan, búkil el kóz tigip otyrǵan efirimizden halyqtyń kóńilindegini dóp basatyn, eldiń joǵyn joqtaityn, ulttyq dástúrlerimiz ben búkil adamzattyq qundylyqtardy nasihattaityn habarlar men dúnieler kórsetilse degen tilegimiz bar» delingen Bas redaktorlar klýbynyń úndeýinde.
