Sýret: qandastar.kz
Tek bir táýliktiń ishinde mobildi toptar turǵyndarǵa 300-ge jýyq baǵalaý paraǵyn taratty, dep habarlaidy "Ult aqparat" Tótenshe jaǵdailar jónindegi jedel shtabyna silteme jasap.
Búgingi tańda jumys komissiiasy 1200 nysandy baǵalaý nátijelerin daiyndady. Onyń ishinde úii sýǵa ketken 357 turǵyn ótemaqy alý týraly kelisimge qol qoidy, 109 turǵynnyń jeke shottaryna ótemaqy qarajaty aýdaryldy.
Qulsary qalasynyń turǵyny Nurshat Áýelbaevanyń aitýynsha, baǵalaý kompaniiasy eseptep, usynǵan qarajat onyń ishki esebimen sáikes kelgen.
"Meniń úiim apatty dep tanyldy. Ol úidi tek buzýǵa kerek. Zardap shekken úiimniń qunyn ádil baǵalaǵandaryna rizamyn, memleketten túsetin ótemaqy shyǵynymdy tolyǵymen jabady. Alynǵan aqshalai ótemaqyǵa jańa úi satyp alamyn. Nemese jańa úi salýym da múmkin. Qazir biz bul máseleni otbasymyzben osy máseleni talqylap jatyrmyz", - dedi Nurshat Áýelbai.
Qulsary qalasynyń taǵy bir turǵyny Kúnzira Tájiǵulova aqshalai ótemaqyǵa jańa turǵyn úi satyp alýǵa nietti.
"Úiimdi basqan sýdyń kólemi eki metr deńgeiinde saqtalyp turdy. Aiaq astynan apattyq jaǵdaiǵa jetken úiimdi ádil baǵalaǵandary úshin rahmet aitamyn. Endi ol úidi alańsyz buzýǵa bolady. Onyń ornyna jańa turǵyn úi satyp alamyz dep otyrmyz", - dedi Kúnzira Tájigulova.
Zardap shekken múlikti baǵalaý jumystaryn osy aptanyń sońyna deiin aiaqtaý josparlanýda.
Búginde qala boiynsha jiyrma mobildi top kúsheitilgen rejimde jumys isteýde. Mamandar úidi aralaýdy jáne zalaldy baǵalaý men zardap shekken múlikke tehnikalyq saraptama qorytyndylaryn túsindirýdi jalǵastyrýda. Mobildi toptardyń jumysy barlyq baǵalaý jumystary tolyq aiaqtalǵanǵa deiin kún saiyn demalyssyz júrgiziletin bolady.
Qulsary qalasyndaǵy № 20 mektep bazasynda úileri apatty dep tanylǵan turǵyndarǵa túsindirý jumystaryn júrgizý jalǵasýda. Sondai aq, sý tasqynynan zardap shekkenderge aqshalai ótemaqy tóleý boiynsha aqparat berilýde.
Sý tasqyny kezinde zardap shekken turǵyndarmen arada aqshalai ótemaqy tóleý boiynsha kelisimder jasasý boiynsha jumystar Jylyoi aýdanynyń mádeniet úiinde júrgizilýde.
