Elimizde aldaǵy úsh jylda jańadan 190 mektep salynady. QR Bilim jáne ǵylym ministri Kúlásh Shámshidinova BQO turǵyndarymen kezdesý kezinde osylai dedi, dep habarlaidy "Ult aqparat".
Onyń aitýynsha, respýblikalyq biýdjettiń úsh jylǵa qaralyp, bekitiletini belgili.
Osy kezeńde iske qosylatyn ǵimarattar eń aldymen apatty jaǵdaidaǵy mektepter máselesin sheshýdi kózdeidi. Ekinshiden, úsh aýysymda oqytatyn mektepter. Úshinshiden, oqýshy oryny jetispeitin bilim oshaqtarynyń jaǵdaiyn jaqsartady. Mysaly, Batys Qazaqstan oblysynda úsh mektep salynyp jatsa, sonyń ekeýi apatty jaǵdaidaǵy ǵimaratty aýystyrýǵa arnalǵan. Bireýi úsh aýysymda oqytatyn mektepterge túsetin júkti jeńildetedi.
«Elimiz táýelsizdik alǵannan beri Qazaqstanda 1672 mektep salynǵan eken. Qazirgi kezde 2 mln astam oqýshy bolsa, sonyń 668 myń oryny osy jyldary iske qosylǵan mektepter úlesinde. Aldaǵy ýaqytta da osylai úsh jyl saiyn mektepter qurylysy qarastyrylyp otyrylady», - dedi ministr.
Kúlásh Noǵataiqyzynyń sózine qaraǵanda, bilim sapasy, árine, muǵalimderdiń kásibi sheberligine bailanysty. Jańartylǵan bilim mazmunyna orai 2017 jyldan beri 144 myń muǵalim biliktilik kýrstarynan ótken. Endi 85 myń synyp jetekshisi men psihologtar oqytylatyn bolady.
«Halyqty jii tolǵandyryp júrgen máseleniń biri úshtildilik ekeni belgili. Joǵary synyptarda himiia, biologiia, fizika, informatika pánderin aǵylshyn tilinde oqytýdy kezeń-kezeńmen, mektep pen muǵalimder daiyn bolǵan kezde engizetin bolamyz. Ár mektep ata-analarmen aqyldasa otyryp sheshedi. Qazirgi kezde respýblika boiynsha úsh tilde oqytýdy bastaǵan 150-den astam mektep bar. Biz ol mektepterde jaǵdai qalai, qandai másele týyndap jatyr, bárin zerdelep qarap otyrmyz. Aldymen pedagogikalyq JOO-larda aǵylshyn tilinde dáris beretin muǵalimderdi daiarlaýǵa kúsh salynatyn bolady. Eń bastysy, bilim sapasy joǵary bolýy qajet. Balalarymyz qazirgi zaman talaptaryna sáikes alǵan bilimderin óz ómirinde paidalana bilýi tiis», - dedi ministr.
