Quqyq qorǵaý organdary qyzmetkerleriniń laýazymdyq ókilettikterin teris paidalanýy faktilerine tekseris júrgiziledi. Bul týraly búgin Ortalyq kommýnikatsiialar qyzmetinde QR IIM Tergeý departamentiniń bastyǵy Sanjar Ádilov málim etti, dep habarlaidy QazAqparat.
«Ishki ister organdary tergeýshileriniń qylmystyq ister boiynsha barlyq sheshimderi zańnama talaptarymen qatań sáikestikte, atap aitqanda, qylmystyq protsestiń úsh býyndy modeli aiasynda qabyldanady. Kúdiktini ustaý, olardyń is-áreketterin saralaý, sondai-aq bultartpaý sharalaryn tańdaý siiaqty barlyq negizgi is júrgizý sheshimderi tek prokýrormen kelisiledi. Odan ózge, tintý, alý, saraptama úshin úlgilerdi alý, sanktsiialaý siiaqty is júrgizý áreketteri tergeý sottarynyń qaýlysy negizinde júrgiziledi. Qylmys jasady degen kúdik boiynsha ustalǵan barlyq adam dene jaraqattarynyń bolýyna meditsinalyq kýálandyrý júrgizilgennen keiin ǵana, ýaqytsha ustaý abaqtysyna qamalady. Sebebi keibireýleri tártipsizdik ornynan tikelei meditsinalyq mekemelerge jetkizilen», - dedi Ádilov.
Onyń aitýynsha, ustalǵan kúdiktilerdiń advokattarǵa qoljetimdiligi qamtamasyz etiledi, qajet bolǵan jaǵdaida memleket qarajaty esebinen tegin qorǵaýshylar qyzmeti usynylady.
«Quqyq qorǵaý organdary qyzmetkerleriniń laýazymdyq ókilettikterin teris paidalanýy jáne bilikti asyra qoldanýy týraly árbir shaǵymǵa prokýratýra organdarymen qatar, Ishki ister ministriniń tapsyrmasymen ózindik qaýipsizdik bólinisteri tekserý júrgizedi. Olardyń bailanys derekteri birinshi kúnnen buqaralyq aqparat quraldarynda jariialanǵan. Sonymen qatar, arnaiy mekemelerdiń meditsina qyzmetkerleriniń usynymdary boiynsha densaýlyq jaǵdaiyna bailanysty birqatar kúdiktilerge qatysty bultartpaý sharalaryn ózgertý máseleleri qarastyrylýda. Búginge osy negizder boiynsha jáne jeke basyn eskere otyryp, birqatar kúdikti kúzetten bosatyldy. Olarǵa qatysty qoǵamnan oqshaýlaýǵa bailanysty emes bultartpaý sharalary qoldanyldy», - dedi Tergeý departamentiniń bastyǵy.
