Resei Federatsiiasy prezidentiniń baspasóz hatshysy Dmitrii Peskov Dúniejúzilik densaýlyq saqtaý uiymynyń «Reseide koronavirýstan qaitys bolǵandar sany basqa elderge qaraǵanda az ekeni «qyzyq» degen málimdemesine jaýap berdi. Bul týraly TASS agenttigi habarlady.
Peskovtyń aitýynsha reseilik derekterde erekshe eshteńe joq. Sonymen qatar, ol Reseidegi tiisti organdar DDSU-men bailanysta ekenin atap ótip, «olar bul máseleniń sheshimin taýyp, DDSU-nyń barlyq suraǵyna jaýap beredi dep oilaimyn» dedi.
Peskov koronavirýstan kóz jumǵandardy esepteý tásiline qatysty suraqqa jaýap bermedi. «Men bul suraqqa qatysty eshteńe túsindire almaimyn. Oǵan epidemiologtarymyz laiyqty jaýap beredi dep úmittenemin» dep suraqty sala mamandaryna joldady.
Sársenbi kúni Jenevadaǵy brifingte DDSU-nyń tótenshe jaǵdai jónindegi direktory Maikl Raian Reseide koronavirýstan qaitys bolǵandar sany basqa eldermen salystyrǵanda az ekenin «qyzyq» qubylys dep atady.
DDSU memleketterge COVID-19-dan bolǵan ólimge qatysty standartty usynys pen sertifikatsiia taratty. Degenmen, direktordyń sózinshe, bul - kúrdeli protsedýra, sebebi ólimge sebep bolatyn janama jaittar bolýy múmkin.
