Qazaqstan Prezidenti Qasym-Jomart Toqaev Álem chempionatynda «kúmis» enshilegen mánerlep syrǵanaýshy Elizabet Tursynbaevany jeńisimen quttyqtady, dep habarlaidy "Ult aqparat".
«Elizabet Tursynbaeva mánerlep syrǵanaýdan Álem chempionatynyń kúmis júldegeri boldy! Tarihta tuńǵysh ret tórt ainalym ádisin oryndady! Jaraisyń! Quttyqtaimyn!», - dep jazdy Q.Toqaev Twitter-degi paraqshasynda.
Aita keteiik, sportshyny QR Mádeniet jáne sport ministri Arystanbek Muhamediuly da quttyqtady.
«Álem chempionatynda Elizabet álemde tuńǵysh ret tórt ainalymǵa sekirý elementin oryndady. Osy jeńispen Elizabetti, onyń ata-anasyn, bapkeri Eteri Týtberidzeni shyn júrekten quttyqtaimyn! Barsha qazaqstandyqtardy bizdiń mánerlep syrǵanaýshymyzdyń sensatsiialyq jeńisimen quttyqtaimyn! Marapattaý rásimin qarap otyrmyz. Qýanyshtymyz!», - dep jazdy ol Facebook paraqshasynda.
Buǵan deiin habarlaǵanymyzdai, Japoniianyń Saitama qalasynda ótip jatqan mánerlep syrǵanaýdan Álem chempionatynda qazaqstandyq Elizabet Tursynbaeva kúmis medal jeńip aldy.
Ol erkin baǵdarlamany tamasha oryndap, qorytyndyda 224,76 ball jinady. Sportshylardyń eń sońynan shyqqan E.Tursynbaeva eresekter arasyndaǵy álem chempionatynda tuńǵysh ret tórt ainalymdyq salhov elementin oryndady. Muny shyn máninde tarihi nátije deýge bolady.
Chempionat qorytyndysynda Reseilik Alina Zagitova 237,50 balmen álem chempiony atandy. Onyń otandasy Evgeniia Medvedeva 223,80 balmen úshinshi orynǵa kóterildi. Osylaisha, 19 jastaǵy Elizabet Tursynbaeva alǵash ret qyzdar arasynda Qazaqstannan shyqqan Álem chempionatynyń kúmis júldegeri atandy.
Jarys sońynda ótken baspasóz máslihatynda sportshy qyz bul medal kútpegen júlde bolǵanyn atap ótti.
«Qazirgi qýanyshymda shek joq. Kúmis medal men úshin kútpegen júlde boldy. Osy sátke deiin bul elementti (tórttik salhov - avt.) taza oryndaǵanyma sene alar emespin. Tańerteńgi jattyǵý sátimen ótti. Sońǵy eki jarysta salhovty oryndaý barysynda qate jibergenimdi bilesizder. Mine, búgin taza oryndap shyqtym. Muz aidynyna bet alǵan kezde ózimdi keremet sezingenmin. Sol sezim sońyna deiin joǵalǵan joq, - dep keltirdi Tursynbaevanyń sózin QR Ulttyq Olimpiadalyq komiteti.
