kórneki foto: voxpopuli.kz
Tótenshe jaǵdailar ministri Syrym Sháriphanov Qaraǵandy oblysynda Kostenko atyndaǵy shahtada bolǵan apattan keiingi úkimettik komissiianyń tergeý qorytyndysyn bólisti, dep habarlaidy Sputnik Qazaqstan.
Ministrdiń aitýynsha, tergeýge qatardaǵy qyzmetkerler emes, tótenshe jaǵdaiǵa tikelei jaýapty injenerlik-tehnikalyq personal alynǵan.
"Úkimettik komissiia jumysynyń qorytyndysy boiynsha biz 19 adamdy anyqtadyq. Bul - jaýapty laýazymdy tulǵalar", - dep málimdedi Sháriphanov Úkimette ótken brifingte.
Vedomstvo basshysynyń aitýynsha, materialdar tergeý organdaryna tapsyrylǵan, olardyń kinásin sot anyqtaidy.
Osy oraida ministr tergeýge alynǵan laýazymdy tulǵalardyń esimin atady.
"AMT bas direktory Iablonskii, personal jónindegi direktor Vinokýrova, kómir departamentiniń tehnikalyq direktory Belyi myrza, kómir departamenti atqarýshy direktorynyń orynbasary Ogai jáne taǵy basqalary", - dedi ol.
Esterińizge sala keteiik, 2023 jylǵy 28 qazanda "Arselor Mittal Temirtaý" (qazirgi "Qarmet") AQ-nyń Kostenko atyndaǵy kómir shahtasynda jarylys bolyp, saldarynan 46 adam qaza tapty. Taǵy 28 kenshi jaraqat alǵan.
Oqiǵanyń sebebin tekserý boiynsha qurylǵan úkimettik komissiia tragediiaǵa 100% jumys berýshi kináli degen qorytyndy shyǵardy.
28 qazanda Memleket basshysy Qasym-Jomart Toqaev Úkimetke "ArselorMittal Temirtaý" kompaniiasymen investitsiialyq yntymaqtastyqty toqtatýdy tapsyrdy.
Al 8 jeltoqsanda "ArselorMittal Temirtaý" kompaniiasynyń jańa iesi qazaqstandyq biznesmen Andrei Lavrentev ekeni belgili boldy. Kompaniiaǵa burynǵy tarihi ataýy – "Qarmet" qaitaryldy.
