© Photo: 24.kz
6 qarashada keshke jaqynda ǵana apat bolǵan Qaraǵandy oblysyndaǵy Kostenko atyndaǵy shahtadan 46-shy kenshiniń denesi tabyldy. Ony qutqarýshylar shamnyń batareiasyndaǵy jeke nómiri arqyly tanyǵan, dep habarlaidy "Ult aqparat" óńir ákimdiginiń baspasóz qyzmetine silteme jasap.
Ákimdik málimetinshe, keshe keshke Kostenko shahtasynda taý-ken tazartý kenshisi Aleksandr Prokýdinniń denesi tabyldy.
"6 qarasha saǵat 20:00-de Kostenko atyndaǵy shahtadan qaza tapqan 46-shy kenshiniń denesi tabylyp, jer betine kóterildi. Tiisti saraptamalar júrgizildi. Izdestirý jumystaryna "Kásibi áskeri avariialyq-qutqarý qyzmetteriniń respýblikalyq ortalyq shtaby" JShS Qaraǵandy filialynyń taý-ken qutqarýshylary jumyldyryldy. Izdeý jumystary táýlik boiy júrgizildi", - deidi oblys ákimi baspasóz qyzmetiniń ókilderi.
Aita keteiik, buǵan deiin Tótenshe jaǵdailar ministrligi onyń denesiniń bir bóligi tabylǵanyn habarlaǵan bolatyn. Alaida ministrlik saraptama qajet ekenin aityp, resmi túrde aqparat bermegen edi.
Esterińizge sala keteiik, 28 qazanǵa qaraǵan túni Qaraǵandy oblysyndaǵy Kostenko atyndaǵy shahtada metan jarylyp, saldarynan 46 kenshi kóz jumdy. Apat faktisi boiynsha qylmystyq is qozǵaldy. Premer-ministrdiń tóraǵalyǵymen úkimettik komissiia quryldy.
29 qazan elimizde Jalpyulttyq aza tutý kúni dep jariialandy.
Osy apattan keiin Prezident "ArselorMittalmen" investitsiialyq yntymaqtasty toqtatýdy tapsyrdy. Úkimet kompaniiany Qazaqstan paidasyna berý týraly aldyn ala ýaǵdalastyqqa qol jetkizilgenin málimdedi.
