Qostanaida Arys qalasyndaǵy qarý-jaraq qoimasynyń jarylýynan zardap shekkenderge qol ushyn sozý úshin arnaiy shtab quryldy. Shtab jumysymen tanystyrý úshin oblys ákimi Arhimed Muhambetov jýrnalistermen kezdesý ótkizdi, dep habarlaidy "Ult aqparat".
Arnaiy qurylǵan shtab quramyna óńirdegi belsendi azamattar engizilgen.
«Mundaǵy maqsat - ýaqyt ozdyrmai tótenshe jaǵdaiǵa tap bolǵan Arys turǵyndaryna qoldan kelgenshe járdemdesý. Osy oqiǵadan keiin birinshi kúni-aq kóptegen memlekettik mekeme, kásiporyndar bir kúndik jalaqy aýdarý máselesin qoldady. Tek qana memlekettik organdardyń qyzmetkerleri zardap shekkenderge 20 million teńgeden astam qarjy aýdardy. Qazir igi is odan ári jalǵasyp jatyr. Budan jekemenshik mekemeler de bas tartyp jatqan joq. Máselen, «Qarasý» Holdingi 3,5 mln teńge, «Milh» JShS 1 mln teńge, «BK - Stroi» qurylys kompaniiasy 2 mln teńge aýdardy. Sondai-aq, «Olja-agro» JShS, «Baian sulý» konditer fabrikasy tárizdi iri óndiris oryndary da bastamaǵa ún qosyp jatyr. Qazirgi tańda Túrkistan oblysyna 20 tonna un, 7 tonna makaron ónimderi, «Baian sulý» AQ 3 tonna kontiderlik ónimder jóneltti», - dedi Arhimed Muhambetov baspasóz jiynynda.
Arnaiy shtab quramynda Qazaqstannyń Eńbek Eri Almat Tursynov, «Atameken» UKP OF jetekshisi Vasilii Rozinov, «Jas qanat-2006» qus farikasynyń basshysy Qairat Maishev, oblystyq máslihattyń hatshysy Sailaýbek Eshanov, «Nur Otan» partiiasy oblystyq bólimshesi tóraǵasynyń birinshi orynbasary Jańabai Beisembaev siiaqty esimi kópke belgili azamattar bar. Óńir basshysy Qostanai oblysynyń Arys qalasyndaǵy qirap, búlingen 450 úidi qalpyna keltirip beretinin aitty. Qazir onda oblys ákiminiń orynbasary Sergei Karpliýk bastaǵan delegatsiia jumys istep jatyr. Olar bir apta ishinde qiraǵan, búlingen úilerdiń shyǵynyn eseptep, qurylys jumystaryna qansha qarajat qajet ekendigin anyqtaidy. Sodan keiin qurylysshylar naqty iske kirisetin bolady.
«Qandai jaǵdai bolmasyn, biz kómek berýge daiynbyz. Qiyn sátte qol ushyn sozý - paryz. Sondyqtan, osy sátti paidalanyp men barsha qostanailyqtardy Arystaǵy aǵaiynǵa qarjylai qoldaýǵa shaqyramyn. Birligi bekem el ǵana alǵa ozady», - dep túiindedi oblys ákimi.
Sondai-aq, oblystyq kásipodaqtar ortalyǵy «Sábi» gýmanitarlyq kómek berý aktsiiasynyń aiasynda 1 jasqa deiingi balalarǵa qostanailyqtardyń atynan qajetti zattardy jinaýdy uiymdastyryp, barlyq qajetti zattardy búgin tústen keiin Túrkistan oblysyna attandyrdy. Onda balalar taǵamy, gigienalyq zattar, kiim-keshekter bar.
Tómende Arystaǵy zardap shekken aǵaiynǵa qarjylai kómek berý úshin «Zdorove.kst» qoǵamdyq qorynyń rekvizitin usynyp otyrmyz.
BIN 190140031149
IIK KZ 6010221000089191
AO «Naradnyi bank Kazahstana»
BIK HSBKKZKX
KBE 16
