2020 jyly Qostanai oblysynyń avtojoldaryn qalypqa keltirýge 44,9 mlrd teńge jumsalady, dep habarlaidy "Ult aqparat".
Oblys ákimdiginde ótken apparat májilisinde avtomobil joldaryn jóndeý máselesi talqyǵa tústi. Jolaýshylar kóligi jáne avtomobil joldary basqarmasynyń basshysy Oljas Nurǵalievtyń aitýynsha, osy jyly jol infraqurylymy sheńberinde 281 joba júzege asyrylady.
«Onyń ishinde «Nurly jol» baǵdarlamasy boiynsha – 18,5 mlrd teńge, «Jumyspen qamtýdyń jol kartasy» aiasynda – 20,3 mlrd teńge, «Aýyl-El besigi» arnaiy jobasy men jergilikti biýdjetten 6,1 mlrd teńge qarastyrylǵan. Barlyǵy 517 shaqyrym jol óńdeledi. Nysandardy jaýapkershiligine alatyn merdiger uiymdar anyqtaldy. Qazir 105 nysan boiynsha qurylys-montaj jumystary bastaldy. Baǵdarlama aiasynda 4982 adam jumysqa ornalastyryldy, onyń ishinde jumyspen qamtý ortalyqtary arqyly 2491 adam alyndy. Jóndeý jumystaryn ýaqytyly jáne sapaly júrgizý úshin qala jáne aýdan ákimderi merdigerlik uiymdarmen birlesip jumys júrgizýdiń kúntizbelik kestelerin ázirlep, bekitti», - dedi basqarma basshysy.
Oblys ákimi Arhimed Muhambetov tiisti departament basshylary men aýdan ákimderine óńir joldaryndaǵy qalypqa keltirý sharalaryn sapaly júrgizýdi baqylaýdy tapsyrdy. Sondai-aq 2020 jylǵa josparlanǵan oblystyq mańyzy bar avtomobil joldaryn jóndeýdi merziminde aiaqtaýdy júktedi.
