Úilerdi sý basý jaǵdaiy Qostanai oblysynyń Qarasý aýdanyndaǵy Qaramyrza aýylynda oryn alǵan. Adamdar qaýipsiz jerge shyǵaryldy, qutqarýshylar men jergilikti atqarýshy organdar úilerdegi sýdy sorǵymen tartyp aldy, dep habarlaidy "Ult aqparat" Qostanai oblysy Tótenshe jaǵdailar departamentine silteme jasap.
Vedomstvonyń atap ótýinshe, kóktemgi sý tasqynyna qatysty jaǵdai búginde turaqty jáne únemi baqylaý ústinde.
«Ortasha táýliktik temperatýralardyń kúrt ósýi men qardyń mol erýi saldarynan Qostanai oblysynyń ortalyq jáne soltústik bóligindegi ózender men sý qoimalarynda sý deńgeii kóterilip jatyr. Kóktemgi tasqyn jalǵasyp, ózender muzdan qarqyndy tazarý ústinde. Qazirgi kezde oblys boiynsha qar basqan jerdiń aýmaǵy 6 paiyzdan az», - dep aqparattandyrdy vedomstvoda.
Alaida 13 sáýir kúni qardyń qarqyndy erýi men erigen qar sýynyń kóbeiýinen Túntigir ózeni arnasynan asqan.
«Qarasý aýdanyndaǵy Qaramyrza aýylynda 39 turǵyn úidi sý basty, ondaǵy sý 30 santimetrge deiin kóterildi. Tótenshe jaǵdailar departamentiniń jergilikti atqarýshy organdarmen birlesken kúshimen zardap shekken turǵyndardy evakýatsiialaý uiymdastyryldy. Sý basqan orynnan evakýatsiialaý pýnkterine 69 adam jetkizildi, olardyń bir bóligi týystarynyń úilerine jaiǵastyryldy. 334 iri qara jáne usaq mal qaýipsiz jerge aidaldy. Qaza tapqandar men zardap shekkender joq», - dep túsindirdi TJD-dan.
Sonymen birge, jergilikti tótenshe jaǵdailar departamenti, atqarýshy organdardyń kúshteri táýlik boiy sý basqan úilerden sýdy sorǵylaý jumystaryn júrgizdi.
«Sý basqan 39 turǵyn úiden sý tolyq sorylyp alynǵan. Qazirgi kezde barlyq turǵyndar úilerine oraldy, Qaramyrza aýylynyń aýmaǵynda sý basqan úiler joq», - dep sendirdi departamentten.
Jalpy alǵanda, oblys boiynsha tasqyn qaýpi joǵary ýchaskelerde táýlik boiy kezekshilik júrgizý jalǵastyrylyp keledi. Tótenshe jaǵdailar departamentiniń kúsh-quraldary joǵary ázirlik jaǵdaiynda.
