Kórneki sýret: QR TJM
Búgin, 11 qazanda tańǵy saǵat 04.29-da Qostanai oblysy Jitiqara qalasynda jeke turǵyn úiden órt shyǵyp, saldarynan shatyry opyrylǵan. Bul týraly óńir ákimdigine silteme jasaǵan Ult.kz habarlaidy.
Oqiǵa ornyna 7 minýt ishinde qutqarýshylar kelip jetkenshe úi tolyǵymen otqa oranǵan. Órtsóndirýshiler tez arada órtti sóndirip, úiindilerdi tazartýǵa kiristi. Saǵat 06:08-de órt oqshaýlanyp, tolyǵymen sóndirildi.
Apat kezinde úide eresekterdiń qaraýynsyz 2011, 2016, 2018, 2019, 2022, 2023 jylǵy kámeletke tolmaǵan balalar bolǵan. Ókinishke qarai úiindilerdi tazartý barysynda bes balanyń denesi tabyldy. Balalardyń úlkeni, 2011 jyly týǵan bala ǵana aman, zardap shekpegen.
Keiinirek tótenshe jaǵdaidyń aldyn ala sebebi aityldy. QR Bas prokýratýrasynyń Telegram-daǵy habarlamasyna sáikes, órttiń aldyn-ala sebebi – peshti qaraýsyz qaldyrý.
