Qostanaida kartop - 157, al sábiz 135 teńgeden satylyp jatyr, dep habarlaidy "Ult aqparat" «Habar 24» arnasyna silteme jasap.
Alaida, arzan kókónis bir adamǵa eki keliden artyq berilmeidi. Áleýmettik dúkender jelisi osyndai shekteý qoiyp otyr. Osylaisha, jergilikti bilik baǵany negizsiz ósiretin alyp-satarlardyń jolyn kesýge yntaly.
Áleýmettik saýda oryndarynda sábiz bazardaǵy baǵadan tórt esege, al kartop eki esege arzan. Mundai baǵany qalalyq ákimdik bekitken. Biraq alyp-satarlardyń kinásinen arzan kókónis tez taýsylyp, sóreler jii bos qalady.
«Kartop pen sábizdi osy jerden satyp alyp, syrtta 3 ese qymbat baǵaǵa satyp júrgender bar. Mundai alyp-satarlardyń jolyn kesý múmkin emes. Tek saýda oryndaryna áleýmettik mańyzy bar taýarlardy satýǵa shekteý qoiý týraly usynys jasadyq. Sonda azyq-túlikten tapshylyq týyndamai, bárine de az-azdap bolsa da jetetin shyǵar dep oilaimyz», - dedi qalalyq kásipkerlik bóliminiń basshysy Ilona Timoshenko.
Kartop pen sábizdi arzandatý úshin saýda oryndary men «Tobyl» áleýmettik-kásipkerlik korporatsiiasy arasynda kelisimshart jasalǵan. Osynyń nátijesinde dúkender jeńildetilgen nesiege qol jetkizip otyr. Endi bilik úsh aiǵa bekitken baǵany ustap turýy shart.
«Biz áleýmettik mańyzy azyq-túlik taýarynyń 16 túrin qamtamasyz etemiz. Bireýinen azdap paida tapsaq, endi birinen shyǵynǵa batýǵa májbúrmiz. Ótken aida shyǵynymyz 8 mln teńgege jetti. Amal joq. Bizge qoiylǵan shart osyndai. Sábizdi 550 teńgeden alyp, 157 teńgeden satyp jatyrmyz. Keibireýler arbany toltyryp tiep alyp ketedi. Sondyqtan bir adamǵa eki keliden artyq satpaityn boldyq», - dedi saýda jelisiniń ákimshisi Botagóz Kóshembaeva.
Qazir oblystyń turaqtandyrý qorynda 300 million teńgege baǵalanǵan azyq-túliktiń 12 túri bar. Óz kezeginde kókónis baǵasy jaqyn kúnderi turaqtalady dep otyr bilik. Buǵan qosa, aimaqqa elimizdiń ońtústik óńirinen kúndelikti 200 tonna kókónis jetkiziledi.
