Qostanai oblysy Arys qalasynda úilerdi jóndeýge kiristi, dep habarlaidy "QazAqparat".
Arystaǵy sońǵy jaǵdailarǵa bailanysty eldiń túkpir-túkpirinen gýmanitarlyq kómek jinalyp, arnaiy qor qurylǵany málim.
Qostanai oblysy da bul bastamadan shet qalmady.
«Oblys ákimi Arhimed Muhambetov Túrkistan oblysynyń ákimi Ómirzaq Shókeevpen bailanysty. Kelissózderdiń nátijesinde Qostanai oblysy arystyqtarǵa búlingen úilerdi qalpyna keltirýge kómektesetini belgili boldy. Qazirgi ýaqytta Arys qalasynda Qostanai oblysy ákiminiń birinshi orynbasary Ǵaýez Nurmuhambetov bastaǵan bir top delegat, memlekettik organdardyń ókilderi jumys istep jatyr», - dedi oblys ákimdiginiń memlekettik sáýlet-qurylys baqylaý basqarmasynyń basshysy Berik Tańjaryqov.
Onyń sózinshe, qala 17 sektorǵa bólinip, Qostanai oblysyna №16 sektor bekitilgen. Sektordaǵy nysandardyń sany - 671, onyń ishinde 659 jeke úi, alty áleýmettik nysan, alty temir jol nysany bar.
«Biz 612 úidi tekserdik. 88 úige zaqym kelmegen, segiz páter tolyǵymen qirady. Jóndeýge jatatyn 516 úidiń 158-i kúrdeli, qalǵan 358-i aǵymdaǵy jóndeýdi qajet etedi. Bizdiń sektordaǵy qalpyna keltirý jumystarynyń barysy Qostanai oblysynyń ákimi A. Muhambetovtyń jeke baqylaýynda. Men kún saiyn onyń aldynda atqarylǵan jumys týraly esep beremin. Bizdiń oblysqa bekitilgen sektordaǵy qurylys-montaj jumystary úshin jergilikti kompaniialardyń qyzmetkerleri tartyldy», - dedi Berik Tańjaryqov.
Qazirdiń ózinde 139 nysanda jumys bastalǵan. Onyń beseýi - jańa úilerdiń qurylysy. Kúrdeli jóndeýdi qajet etetin 82 nysanda shatyrdy bólshekteý jáne montajdaý jumystary júrgizilýde. Aǵymdaǵy jóndeý jumystary jetkilikti 50 úide plastikalyq terezeler ornatyldy. Kúrdeli jóndeýdi qajet etetin 12 úidiń jumysy aiaqtaldy. Qalpyna keltirý jumystaryna taǵy 365 úi kezekte tur.
