Qazaqstan Respýblikasynyń Memlekettik hatshysy Qyrymbek Kósherbaev «Mereili otbasy» ulttyq baiqaýynyń laýreattaryn marapattaý rásimine qatysty, dep habarlaidy Aqorda.
Otbasy kúni qarsańynda Qazaqstan Respýblikasynyń Memlekettik hatshysy Qyrymbek Kósherbaevtyń qatysýymen onlain formatta «Mereili otbasy» ulttyq konkýrsynyń laýreattaryn marapattaý rásimi ótti.
Memlekettik hatshy saltanatty rásimdi ashyp, Qazaqstan Prezidenti Qasym-Jomart Toqaevtyń quttyqtaýyn oqyp berdi. Onda konkýrstyń óskeleń urpaqty tárbieleýdegi jáne otbasylyq qundylyqtardy nyǵaitýdaǵy mańyzdy róli aitylǵan.
«Men Qazaqstandaǵy ár shańyraq berik bolyp, árbir áýlet baqytty ǵumyr keshkenin qalaimyn. Sol úshin otbasy saiasatyna basa mán beremin. Urpaqtyń boiyndaǵy adamgershilik pen adaldyq, eńbekqorlyq pen meiirimdilik, ultjandylyq pen otanshyldyq siiaqty asyl qasietterdiń bári, eń aldymen, otbasynda qalyptasady. Qazaq – qashanda ata-anany syilaǵan, úlkenge qurmet, kishige izet kórsete bilgen jurt. Qazirgi jahandaný zamanynda rýhani qundylyqtardy halqymyzdyń ómir saltyna ainaldyrý – asa mańyzdy mindet. Jyl saiyn «Otbasy kúnine» orai ótkiziletin ulttyq konkýrs buǵan zor úles qosýda. Onyń, ásirese, jastar úshin berer taǵylymy men tálim-tárbiesi zor», – delingen Prezident quttyqtaýynda.
Aita keteiik, biyl konkýrsty ótkizýdiń jańa tásilderi engizildi. Soǵan sáikes endi jyl saiyn respýblika boiynsha 17 úzdik otbasy anyqtalatyn bolady. Biyl óńirlik konkýrstyq komissiialarǵa barlyǵy 2768 ótinim tústi. Jańa erejelerge sáikes ótinimder tek otbasylardan ǵana emes, zańdy tulǵalardan da qabyldandy.
Is-shara sońynda Memleket basshysynyń atynan laýreat otbasylarǵa estelik syilyqtar tabystaldy.
