Kóshede kóliktegi mýzykany qatty oinatý qanshalyqty zańdy? Ishki ister ministrliginiń aqparat alańynda ótken onlain brifingide BAQ ókilderi osyndai saýal qoidy, dep habarlaidy QazAqparat.
Bul suraqqa IIM Ákimshilik politsiia komiteti tóraǵasynyń orynbasary Jandos Muratáliev jaýap berdi.
Onyń aitýynsha, ereje boiynsha keibir jol qozǵalysyna qatysýshylardyń jeke quqyqtary basqa qatysýshylardyń quqyqtaryn buzbaýǵa tiis.
«Iaǵni, jol qozǵalysyna qatysýshylardyń bári ózara syilasyp, qozǵalysqa qaýipsiz jaǵdai jasaýǵa, basqa qatysýshylarǵa kedergi jasamaýǵa mindetti. Mundai faktiler anyqtalǵan jaǵdaida azamattarǵa shekten tys áreketterdi sýret pen videoǵa túsirýdi usynamyn. Sodan keiin Ákimshilik politsiia komitetine habarlaýǵa nemese «102» nómirine habarlasýǵa bolady», - dep túsindirdi Ákimshilik politsiia komiteti tóraǵasynyń orynbasary.
Atalmysh sharada IIM resmi ókili Nurdildá Oraz «Quryq» teńiz portynan ótýshilerge jalǵan PTR-test anyqtamasyn satqan feldsher ustalǵanyn habarlaǵan bolatyn.
«Turǵylyqty jeri boiynsha tergeý áreketterin júrgizý kezinde kúdiktiden satýǵa daiyn 48 jalǵan PTR-test, noýtbýk, printer jáne tiisti qujattar daiyndaýǵa qajet basqa da tehnikasy tárkilendi. Atalǵan fakti boiynsha sotqa deiingi tergeý bastaldy. Onyń barysynda tergeý kúdiktilerdiń qylmystyq is-áreketiniń naqty aýqymy jáne memlekettik shekaradan zańsyz ótken adamdardyń sany anyqtalyp jatyr. Ishki ister ministrligi jalǵan qujat jasaǵany úshin 4 jylǵa deiin bas bostandyǵynan aiyrý túrindegi qylmystyq jaýapkershilik, al ony paidalanǵany úshin 40 táýlikke deiin qamaýǵa alý kózdelgenin eske salady», - dedi Nurdildá Oraz.
