Foto: gov.kz
Biyl qos azamattyq úshin jazany kúsheitýge qatysty ózgerister engiziledi. Bul týraly onlain brifingte Ishki ister ministrliginiń baspasóz hatshysy Shuǵyla Turlybek málimdedi, dep habarlaidy Sputnik Qazaqstan.
Resmi málimetke sáikes, byltyr qos azamattyqpen júrgen 841 adam ákimshilik jaýapkershilikke tartyldy. Sottyń sheshimimen 138 adam elden shyǵaryldy, qalǵandaryna aiyppul salyndy. Sońǵy bes jylda azamattyq týraly zańnamany buzǵan 3515 adam anyqtaldy. Barlyǵynyń qazaqstandyq azamattyǵy joiyldy.
Zań boiynsha qos azamattyǵy bar faktini jasyrǵany úshin 200 AEK-ke (690 000 teńge) deiin aiyppul ne Qazaqstan aýmaǵynan shyǵarý jazasy qarastyrylǵan.
"Biyl qos azamattyq faktileriniń aldyn alý úshin ekinshi azamattyǵyn jasyrǵandarǵa jaýapkershilikti qatańdatý úshin zańnamalyq aktilerge túzetýler engizý josparlanýda", - deidi Turlybek.
Aita keteri, ózge eldiń azamattyǵyn qabyldaǵannan keiin 30 táýlik ishinde azamattyǵyn joǵaltýdy tirkeý úshin Qazaqstannyń konsýldyq mekemesine júginý kerek.
