Almatydaǵy S. D. Asfendiiarov atyndaǵy QazUMÝ meditsinalyq-sanitarlyq alǵashqy kómek bóliminiń meńgerýshisi, PhD filosofiia doktory Dinara Mahanbetqulova onlain brifing barysynda virýstyń taralýy nelikten birde tómendep, birde ósip ketetinin túsindirdi, dep habarlaidy QazAqparat tilshisi.
Onyń aitýynsha, shekteý sharalaryn saqtaǵan kezde aýrý juqtyrý kórsetkishi aitarlyqtai tómendeidi.
«Áleýmettik araqashyqtyqty saqtaý, maska taǵý, lokdaýn jariialaǵanda virýstyń taralýy tómendegenin kórdik. Keiin karantin talaptaryn jeńildetkende virýstyń taralýy qaita órshi túsedi. Áleýmettik qashyqtyqty saqtaǵan saiyn naýqastar sany azaiady. Tamyz aiynan bastap virýs juqtyrýshylar sany tómendedi, bul vaktsina alýshylar sanynyń artýymen bailanysty», - deidi ol.
Sonymen qatar ol aýrýhanaǵa aýyr halde túsetin naýqastar sany nelikten artqanyn aitty.
«Koronavirýs aýrýynyń belgileri byltyrdan beri birqalypty ótýde. Soǵan bailanysty naýqastar úide óz betinshe emdele bastady. Onyń arty adam densaýlyǵynyń nasharlaýyna ákep jatyr. Óz betinshe emdelgen durys emes, qandaida bir aýrý belgisi bilinse ýaqyt ozdyrmai dárigerge qaralý kerek. Koronavirýstyń belgisi ol túshkirý, muryn bitelýi, jótel, dene qyzýynyń kóterilýi, býyndardyń syrqyraýy jáne taǵy basqalary. Bul belgiler JRVI men tumaýǵa da tán. Olardy ajyratý úshin birinshi kezekte dárigerge habarlasý qajet. Tájiribe kórsetkendei qazir bul aýrý belgilerine ishek infektsiiasy qosyldy»,- deidi Dinara Mahanbetqulova.
Spiker immýniteti tómen adamdar koronavirýsty juqtyrýǵa beiim keletinin tilge tiek etti.
«Immýniteti tómen jáne sozylmaly aýrýy bar adamdar jii aýyrady. Ol eresek nemese orta býyn ókilderi bolýy múmkin, eger adamnyń immýniteti tómen bolsa, ol jerde jas ereksheligi mańyzdy emes. Óitkeni qazir balalar da aýyryp jatyr», - dedi ol.
