Sońǵy aida elimizde koronavirýspen syrqattanýshylyq 2,4 ese tómendedi. Bul týraly QR Densaýlyq saqtaý ministri Aleksei Tsoi málim etti, dep habarlaidy QazAqparat.
«Qyrkúiektiń basymen salystyrǵanda syrqattanýshylyqtyń kúndelikti deńgeii 2,4 ese tómendedi. Bir ai ishinde taralý indeksi – birden tómen. Infektsiialyq tósek-oryndardyń qamtylýy 39 paiyzdan 33 paiyzǵa deiin, reanimatsiialyq tósek-oryndardyń qamtylýy 40 paiyzdan 31 paiyzǵa deiin tómendedi», - dedi ministr Ortalyq kommýnikatsiialar qyzmetindegi baspasóz máslihatynda.
Sonymen qatar Aleksei Tsoi aýyr naýqastar sanynyń tómendeýi de baiqalatyndyǵyn aitty.
«Sońǵy aida aýyr jáne óte aýyr naýqastar sany 2 ese azaidy», - dedi ol.
