Jenevada Dúniejúzilik densaýlyq saqtaý uiymynyń 73-shi sessiiasy ótip jatyr. Oǵan álemniń 194 múshe-memleketiniń ókili qatysýda, dep habarlaidy QazAqparat.
Assambleianyń ashylýynda QHR Tóraǵasy Si Tszinpin, Frantsiia prezidenti Emmanýel Makron, Germaniia kantsleri Angela Merkel, Ońtústik Koreia basshysy Mýn Chje In, sondai-aq Ońtústik Afrika Respýblikasy men Afrika elderiniń prezidentteri sóz sóiledi.
«Biz – álem memleketteri daǵdarysqa qarsy turý úshin biriktik. Virýspen kúresti jalǵastyryp jatqandarǵa qoldaý bildiremiz. Bul qiyndyqty biriksek qana jeńe alamyz, sol úshin bolashaqqa úmit artamyz. Álem budan buryn da pandemiiamen betpe-bet kelgen. Áitse de, koronavirýs pandemiiasy óte qaýipti. Virýs, ókinishke qarai, tez taralady ári em qabyldamasa ólimge ákeledi... Shynynda da, ol ormandaǵy ot siiaqty. Álemde 4,5 millionnan astam COVID-19 oqiǵasy tirkelgen. Ólim jaǵdaiy - 300 myń. Tutas otbasylar, qaýymdastyqtar, ulttar zardap shegip jatyr. Árine bul jerde aýrý týraly ǵana emes, ólim týraly, densaýlyq saqtaý júiesiniń kemshiligi týraly áńgime aitylyp otyr», - dedi DDU Bas direktory Tedros Adanom Gebreiesýs 73-shi sessiianyń ashylýynda sóilegen sózinde.
Onyń aitýynsha, koronavirýs pandemiiasy adam oilamaǵan ózgeristerge alyp keldi.
«Nebári 6 ai buryn ǵana shýly ári ómirge toly qalalar bos qalatynyn, meiramhanalar jabylyp, ǵalamdyq saiahat toqtaitynyn eshkim oilamaǵan da edi. Qazir qarapaiym qol berip amandasýdyń ózi - sizdiń ómirińiz úshin qaýipti», - dep eskertti DDU basshysy.
Tedros Adanom Gebreiesýstiń sózinshe, koronavirýs ásirese kedei elderge qatty áser etýde. Bul – daǵdarys aiasyndaǵy mańyzdy problemalardyń biri.
«Alty aidan az ýaqyt ishinde pandemiia búkil álemdi dúr silkindirdi. Barlyq elderdiń aldynda úlken qiyndyq tur. Iri jáne kishi, bai jáne kedei, damýshy elder, qaqtyǵys aimaǵyndaǵy elder, eń kóp zardap shekken elder – bári de qazir virýs qursaýynda. Eldi mekenderde ómir súrgen kezde áleýmettik qashyqtyqty qalai saqtaisyz, qolyńyz gigienasyn qalai saqtaisyz, taza sý jetkilikti me?
Keibir memleketter eleýli shekteýler men karantin tártibin engizdi. Keibir elder qiyn jaǵdaiǵa endi daiyndalyp jatyr. Keibir elder áli de shekteýlerdi qalai alyp tastaý kerektigin saraptaýda. DDU elderdiń aiaqqa turyp, qalypty ómirge oralýyn, jumys isteýge degen umtylysyn tolyǵymen qoldaidy ári túsinedi. Biz bárimiz jahannyń tezirek qalpyna kelýin qalaimyz. Elderdi saqtyqpen áreket etýge shaqyramyz. Densaýlyq saqtaý arhitektýrasyn eskerýsiz jyldam júrgizetin elder úlken qaýip-qaterge ushyraýy múmkin», - dep eskertti uiymnyń Bas direktory.
