Premer-Ministrdiń orynbasary Eraly Toǵjanov Májilis depýtatynyń dári-dármektiń shekti baǵasyn belgileý mehanizmi týraly saýalyna jaýap berdi, dep habarlaidy "Ult aqparat".
«Memleket basshysynyń dárilik zattarǵa baǵany tómendetý jónindegi tapsyrmasyn oryndaý úshin Densaýlyq saqtaý ministrligi Básekelestikti qorǵaý jáne damytý agenttiginiń maquldaýymen tegin meditsinalyq kómektiń kepildik berilgen kólemi sheńberinde jáne mindetti áleýmettik meditsinalyq saqtandyrý júiesinde dárilik zattarǵa, sondai-aq meditsinalyq buiymdarǵa qoiylatyn shekti baǵalar men ústeme baǵalardy retteý, qalyptastyrý qaǵidalaryn bekitken. Sol qaǵidada karantin, tótenshe jaǵdai rejimi, áleýmettik meditsinalyq saqtandyrý júiesiniń tótenshe jaǵdailary kezinde shekteý sharalary qalai iske asatyny kórsetilgen», - dep jazylǵan Eraly Toǵjanovtyń jaýabynda.
Úkimet basshysynyń orynbasary erekshe tártipti qoldaný kezinde shekti baǵa kóterme jáne bólshek saýda úshin marketingtik shyǵyndardy eseptemeý (30% mólsherinde), sondai-aq kóterme saýdada (20-dan 10%-ǵa deiin) jáne bólshek saýdada (55-ten 27,5%-ǵa deiin) ústeme baǵalaryn eki ese tómendetý jolymen qalyptasatynyn aitady.
«2020 jylǵy 31 jeltoqsanda DSM koronavirýs infektsiiasyn emdeý hattamasyna kiretin 370 preparattyń shekti baǵasyn bekitti. Osylaisha, koronavirýsqa qarsy barlyq preparatqa erekshe tártip qoldanylyp otyr. Sonyń nátijesinde baǵanyń tómendeýi naryqtyq baǵalarmen salystyrǵanda 27%-dy qurady», - dedi vitse-premer.
