Koronavirýs juqtyrǵan dárigerge 2 million teńge mólsherinde saqtandyrý tólemi beriledi. Bul týraly «Habar 24» telearnasynyń tikelei efirinen QR Aqparat jáne qoǵamdyq damý ministri Dáýren Abaev aitty, dep habarlaidy QazAqparat.
«Meditsina qyzmetkerleriniń densaýlyǵy men ómirin saqtandyrý máselesi de pysyqtaldy. Olar aýyryp qalǵan jaǵdaida 2 million teńge mólsherinde saqtandyrý tólemi beriledi. Qudai saqtasyn, biraq eger meditsinalyq qyzmetker qaitys bolǵan jaǵdaida 10 million teńge mólsherinde tólemaqy beriledi. Bul jańalyq tek dárigerlerdiń ǵana emes, barsha qazaqstandyqtardyń rýhyn kóterip, kóńilin serpiltedi dep oilaimyz», - dedi Dáýren Abaev.
Sonymen qatar ministr qazir kúrdeli de qiyn ýaqyt ekendigin basa aitty.
«Biraq, bul qiyndyqtan qashý, eńseni túsirý degendi bildirmeidi. Elimizde kún saiyn júzdegen volonterler, metsenattar qaiyrymdylyq jasaýda. Óner adamdary onlain-kontsert berýde. Odan basqa da meiirimdilik mysaldary kóp. Osynyń barlyǵy rýhymyzdyń myqtylyǵyn dáleldeidi», - dedi ol.
Onyń atap óttýinshe, bul sharaǵa biznes ókilderi de atsalysýda. Mysaly, «Kar-Tel», «Ksell», «Mobail Telekom-Servis» kompaniialary koronavirýspen kúresip jatqan barlyq dárigerlerdi tegin uialy bailanyspen qamtamasyz etti.
«Tótenshe jaǵdai kezinde elimizde 20 myńnan astam meditsina qyzmetkerlerine tegin bailanys jáne internet paketi berildi», - dedi ministr.
